“Gələcəyini seç - narkomaniyaya yox de!”
“Konstitusiya və Suverenlik İli” çərçivəsində Azərbaycan Respublikası Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının 2025-ci il üçün iş planına və dövlət proqramına uyğun olaraq Məktəbəqədər və Ümumi Təhsil üzrə Dövlət Agentliyinin Respublika Uşaq-Gənclər İnkişaf Mərkəzi (RUGİM) tərəfindən iyunun 11-də “Gələcəyini seç-narkomaniyaya yox de!” mövzusunda maarifləndirmə tədbiri keçirilib.
Crossmedia.az Mərkəzə istinadən xəbər verir ki, tədbirin əsas məqsədi narkotik vasitələrin qanunsuz dövriyyəsinə və narkomanlığa qarşı mübarizədə maarifləndirmə işlərinin səmərəliliyinin artırılması, məktəblilərdə antinarkotik dünyagörüşünün və narkomanlığın fəsadları barədə anlayışların formalaşdırılması, sağlam həyat tərzinin təbliği, azyaşlılar arasında zərərli vərdişlərə meyilliyin azaldılması istiqamətində məktəbdənkənar təhsil müəssisələrində təlim-tərbiyə işlərinin təkmilləşdirilməsi, dövlət qurumları arasında əməkdaşlıq əlaqələrinin genişləndirilməsindən ibarətdir.
RUGİM-in, Gənclər və İdman Nazirliyinin, Azərbaycan Respublikası İnsan Hüquqları üzrə Müvəkkili (Ombudsman) aparatının, Səhiyyə Nazirliyinin İctimai Səhiyyə və İslahatlar Mərkəzinin nümayəndələrinin təmsil olunduğu tədbirdə 150-yə yaxın metodist, dərnək rəhbəri və üzvləri iştirak ediblər.
Tədbiri giriş sözü ilə açan mərkəzin direktor müavini Dilarə Hacıyeva Elm və Təhsil Nazirliyinin tədbirlər planına uyğun olaraq gənc nəslin zərərli vərdişlərdən qorunması istiqamətində RUGİM-in pedaqoji heyəti tərəfindən keçirilən xüsusi dərsləri, ardıcıl maarifləndirmə tədbirlərini və dərnək rəhbərləri üçün tərtib olunmuş metodiki tövsiyələri qeyd edərək bu sahədə maarifləndirmənin genişləndirilməsinin vacibliyini vurğulayıb. Daha sonra çıxış edən mərkəzin direktor müavini Lalə Dadaşova məktəblilərin asudə vaxtlarının səmərəli təşkili və zərərli vərdişlərdən uzaqlaşdırılması məqsədilə təlim-tərbiyə işlərində innovativ təlim metodlarının tətbiqinin, bu sahədə valideynlər, müəllimlərin, məktəb psixoloqlarının və dərnək rəhbərlərinin birgə fəaliyyətinin əhəmiyyətini qeyd edib.
Azərbaycan Respublikası İnsan hüquqları üzrə Müvəkkili (Ombudsman) aparatının Uşaq hüquqlarının müdafiəsi sektorunun əməkdaşı İlahə Əfqanlı, Gənclər və İdman Nazirliyinin Gənclərlə iş şöbəsinin sektor müdiri Elşən Qəhrəmanov, Səhiyyə Nazirliyinin İctimai Səhiyyə və İslahatlar Mərkəzinin Təlim resurs şöbəsinin müdir müavini Pərvin Quliyeva çıxış edərək narkotiklərin, psixotrop maddələrin və onların prekursorlarının insan sağlamlığına mənfi təsiri barədə uşaq və gənclərin məlumatlandırılmasının əhəmiyyətinin vacibliyini qeyd ediblər.
RUGİM-in mütəxəssisi Fərid Seyfullayev tərəfindən mövzuya uyğun təqdimat nümayiş etdirilib. Dərnək rəhbərlərinin və üzvlərinin iştirakı ilə mövzu ətrafında interaktiv müzakirələr aparılıb, suallar cavablandırılıb.
19:46 11.06.2025
Oxunuş sayı: 1086
