Politoloq: "Tramp-Mask qarşıdurması hər iki tərəfin imicinə və kampaniyasına zərbə vurur”
ABŞ Prezidenti Donald Tramp “SpaceX”in yaradıcısı İlon Maskla mümkün telefon danışığına etiraz etmədiyini, lakin ona zəng etməyi planlaşdırmadığını bildirib.
Bu barədə Vaşinqton administrasiyasının rəhbəri Ağ Evdə jurnalistlərə bildirib.
“Düşünərdim ki, o mənimlə danışmaq istəyir. Bəlkə də artıq zəng vurub. Ondan zəng edib-etmədiyini soruşsanız yaxşı olar. Amma mənim buna qarşı heç bir etirazım yoxdur”, - Tramp əlavə edib.
"Maskın yerində olsaydım, belə bir söhbətə ümid edərdim", - ABŞ Prezidenti bildirib.
Eyni zamanda Tramp Maskın zənginə cavab verib-verməyəcəyini dəqiq deməyib. O, jurnalistin sualını cavablandırarkən vurğulayıb: “Mən bunu demək istəmirəm” .
Ağ Evin mətbuat katibi Kerolayn Livitt iyunun 8-də bildirib ki, Tramp yaxın günlərdə Mask ilə danışmaq niyyətində deyil.
Tərəflər arasında artan gərginlik barədə Crossmedia.az-a danışan siyasi şərhçi Turab Rzayev deyib ki, dövlət başçısı ilə sahibkar arasında münasibətlərin pozulması hər iki tərəfə zərbə vurur: “Onlar seçki kampaniyası zamanı birgə çıxış etmişdilər. Maskın Trampı dəstəkləməsi sosial platformalarda ona böyük üstünlük qazandırmışdı. Bu dəstək texnokratların Trampa yaxınlaşmasına səbəb olmuşdu və onun gənc, müasir texnoloji nəsli öz ətrafında cəmləşdirməsi anlamına gəlirdi”.
T.Rzayev bildirib ki, münasibətlərin bu şəkildə pozulması və tərəflərin bir-birinə qarşı kampaniya aparması hər iki şəxsə zərər verir: “Maskın rəhbərlik etdiyi “Tesla” şirkətinin səhmləri artıq ucuzlaşıb. Bu, ciddi maliyyə itkisinə səbəb olub. Digər tərəfdən isə Maskın Tramp haqqında paylaşdığı bəzi məlumatlar onun ictimai imicinə neqativ təsir göstərmək gücünə malikdir. Təsadüfi deyil ki, bu gərginlikdən sonra İlon Mask X platformasında Trampla bağlı yazdıqlarını silib. Diqqətçəkən məqam isə odur ki, hər iki tərəf – həm Tramp, həm də Mask – bir-birinə qarşı özlərinə məxsus sosial media platformalarında mübarizə aparırlar. Bu, münasibətlərin nə qədər dərin şəkildə pozulduğunu göstərir. Trampın Maskla görüşə açıq olması, əslində münasibətləri aydınlaşdırmaq və problemləri həll etmək niyyəti ilə bağlıdır. Onun fikrincə, Tramp düşünür ki, şəxsi dialoqla qarşıdurmanı aradan qaldırmaq mümkündür. Eyni zamanda Maskın da bu qarşıdurmanı gündəmdə saxlamaqla Trampa təsir göstərməyə çalışdığı ehtimal edilir”.
Müsahibimiz qeyd edib ki, Maskın effektivlik və idarəetmə sahəsindəki gözləntiləri doğrultmaması ilə bağlı fikirlər də formalaşıb: “Effektivliyin dayağı olmaq və lazım gələndə bu effektivliyi artırmaq Mask üçün çətin görünür. Trampın onu ittiham etməsi – yəni yalnız şəxsi avtomobil satışını güdməsi ilə bağlı iradları – Maskın karyerasına da mənfi təsir edə bilər. Trampın artıq Maskı indiki rolunda, daha doğrusu, Tramp dövründə ona ayrılmış siyasi-simvolik və ya strateji rolda görmək istəməməsi ehtimalı yaranıb. Bu isə münasibətlərin gələcəkdə tamamilə dayanmasına səbəb ola bilər”.
Fatimə Nəbiyeva
20:13 10.06.2025
Oxunuş sayı: 2039
