Politoloq: “ABŞ-Rusiya münasibətlərindəki köhnə ziddiyyətlər, anlaşılmazlıqlar qalacaq”
ABŞ prezidenti Donald Trampın xüsusi nümayəndəsi Rusiyaya qarşı yeni sanksiyaların hazırlandığını açıqlayıb. Bildirilib ki, bu addımlar Moskvanın beynəlxalq hüquq normalarını pozmasına cavab olaraq nəzərdə tutulub. Yeni məhdudiyyətlərin Rusiya iqtisadiyyatına ciddi təsir göstərəcəyi gözlənilir. Mövcud siyasi gərginlik fonunda Vaşinqton-Moskva münasibətlərində yeni gərginlik dalğası yarana bilər.
Mövzu ilə bağlı Politoloq Tofiq Abbasov Crossmedia.az-a verdiyi açıqlamada bildirib ki, Rusiyaya qarşı sanksiyaların tətbiqi ABŞ-Rusiya münasibətləri kontekstində tam oturuşmuş bir məsələdir və burada yeni heç nə yoxdur.
T.Abbasovun sözlərinə görə, bu iki ölkə bir-birinə qarşı ekzistensial rəqibdirlər, hətta aralarında açıq düşmənçilik mövqeləri mövcuddur. Onun fikrincə, Tramp Rusiyadan mümkün olmayan bir şeyi tələb edir: “Barış, gəl otur danışıqlara – bu cür çağırışlar səsləndirir. Amma özü də gözəl bilir ki, Rusiya heç vaxt kiminsə xoşuna, əhvalına uyğun şəkildə atəşkəsə və ya barışa getməyəcək”.
Tofiq Abbasov bildirib ki, ABŞ əvvəlcədən anlayır ki, Rusiya bu cür təşəbbüsləri qəbul etməyəcək və bu səbəbdən də, Vaşinqton beynəlxalq arenada sanki sülhpərvər bir mövqe nümayiş etdirərək, sonradan sanksiyalar tətbiq etmək üçün zəmin yaradır: “Amerika elə bir situasiya formalaşdırır ki, guya mən təklif verdim, çox cazibəli, sülhpərvər təşəbbüslər irəli sürdüm, amma Rusiya bunları qəbul etmədi. Deməli, indi məhsuldar tədbirlər görməliyəm, sanksiyalar tətbiq etməliyəm və sair”.
Politoloq vurğulayıb ki, bu məsələ artıq Donald Trampın seçki kampaniyası dövründən bəlli idi. Onun sözlərinə görə, Tramp sanki vəd edir ki, gələcəkdə barışa nail olacaq, amma əslində bu mümkün deyil. Çünki Qərbin özü bu müharibədə maraqlıdır: “Bir yandan iki dövləti – Rusiya və Ukraynanı vuruşdurmaqla ilk növbədə Rusiyanı zəiflədirlər. Digər tərəfdən, müharibə fonunda öz ölkələrinə silah satırlar, strateji üstünlüklər əldə edirlər”.
T.Abbasov əlavə edib ki, müharibə həm də Qərb dünyasının yeni dünya nizamını formalaşdırmaq üçün istifadə etdiyi bir alətdir. O, deyib ki, Qərb ölkələri müxtəlif regionlarda ikitərəfli münasibətləri zəiflədərək, öz geosiyasi maraqlarını gücləndirməyə çalışırlar.
Politoloqun sözlərinə görə, ABŞ və Rusiya nəhəng dövlətlərdir və onların hərbi gücü, nüvə arsenalı dünya miqyasında lider səviyyəsindədir. Onun fikrincə, Amerikanın texnoloji üstünlüyü Rusiya ilə qarşıdurmalarda balansı saxlayır. T.Abbasov, Rusiya və ABŞ-ın silah arsenalına görə dünyada liderdir olduğunu vurğulayıb. O, Rusiyada silahların sayının bir qədər çox olsa da, Amerikanın texnoloji üstünlüyü bu fərqi kompensasiya etdiyini deyib.
Ekspert hesab edir ki, münasibətlərdə kəskin dönüş gözlənilmir və Trampın bəzi fərqli ritorikasına baxmayaraq, ABŞ-ın ümumi siyasət kursu dəyişməyəcək. “Amerika çox aqressiv bir dövlətdir. Bəli, Tramp fərqli ritorika ilə çıxış edə bilər, amma o, ABŞ-ın prezidentidir. Və onun rəhbərlik müddəti də məhduddur. Bu üç-dörd ildən sonra dəyişə bilər. Amma ABŞ-Rusiya münasibətlərindəki köhnə ziddiyyətlər, anlaşılmazlıqlar qalacaq” – deyə Tofiq Abbasov bildirib.
Fatimə Nəbiyeva
16:52 04.06.2025
Oxunuş sayı: 10668
