Azər Əmiraslanov: "Büdcənin icrası ilə bağlı müzakirələr məhsuldar olub"
“2024-cü il dövlət büdcəsinin icrası haqqında” qanun layihəsinə dair müzakirələr məhsuldar olub. Bunu Milli Məclisin İqtisadi siyasət, sənaye və sahibkarlıq komitəsinin sədri Azər Əmiraslanov parlamentin növbədənkənar sessiyasının bu gün keçirilən ilk iclasında - qanun layihəsinin I oxunuşda müzakirəsi zamanı bildirib.
"Komitə çərçivəsində məhsuldar büdcə müzakirələrinə yüksək səviyyədə şərait yaradılmasına görə parlament sədrinə təşəkkürümüzü bildiririk. Bu parlamentin bir tərəfdən hökumətlə, onun iqtisadi bloku ilə işgüzar əməkdaşlığa böyük önəm verməsini, digər tərəfdən də Milli Məclisin büdcə məsələlərinə özünün əsas mandatı kimi xüsusi əhəmiyyət verdiyini göstərir", - deyə o qeyd edib.
A.Əmiraslanovun sözlərinə görə, sənədi və illik hesabatı Prezident İlham Əliyev “Büdcə sistemi haqqında” qanuna uyğun olaraq Milli Məclisin müzakirəsinə təqdim edib: "Büdcə qanunvericiliyinə əsasən, Hesablama Palatasının müvafiq rəyi də təqdim olunub. Qanun layihəsi və illik hesabat iqtisadi bloku təmsil edən dövlət orqanları rəhbərlərinin və nümayəndələrinin geniş tərkibdə iştirakı ilə səmərəli və konstruktiv müzakirə edilib. Komitə üzvləri büdcə siyasətinə dair vacib məsələlər qaldırıb, dəyərli təkliflər səsləndirib. Eyni zamanda Hesablama Palatasının büdcə dəyərləndirilməsinə dair çıxardığı nəticələri və irəli sürdüyü tövsiyələri də praktiki baxımdan faydalı hesab edirik. Qaldırılan bütün məsələlərlə bağlı maliyyə naziri Sahil Babayev geniş şərhlər verib, sualları ətraflı cavablandırıb. Büdcə prosesi inkişaf səviyyəsindən asılı olmayaraq bütün ölkələrdə davamlı xarakter daşıyır. İl ərzində aparılan müzakirələr növbəti büdcə ilinin müzakirələri üçün yaxşı bir zəmin, tematik baza yaradır və büdcə sisteminin təkmilləşdirilməsinə xidmət edir".
"Hesabat büdcə qanunvericiliyi ilə müəyyən edilmiş müddətdə və formada təqdim edilmişdir. İcraya dair büdcə zərfi ölkəmizin 2024-cü ildə makroiqtisadi durumunu, dövlət büdcəsinin gəlir və xərclərinin icrasını, il ərzində dövlət borclanması sahəsində vəziyyəti səciyyələndirən zəruri məlumatları özündə əks etdirir. Bu məlumatlar, o cümlədən ali maliyyə nəzarəti orqanının rəyi büdcənin icra vəziyyətini geniş təhlil etməyə və qiymətləndirməyə imkan verir", - deyə deputat əlavə edib.
11:37 03.06.2025
Oxunuş sayı: 8648
