Tarixə təxribat, birliyə zərbə: Türk dövlətləri ayıq olmalıdır
“Biz xalqlarımız arasındakı qohumluq, qardaşlıq və yaxın əlaqələrə qürur duymalıyıq.” — Qırğızıstan Prezidenti Sadır Japarov son günlər sosial mediada yayılan və Kenesarı xanın Qırğız torpaqlarına yürüşünü təhrif edən video ilə bağlı bu sözlərlə çıxış edib. Prezidentin fikrincə, bu cür məzmunlar qəsdən iki qardaş xalq olan qazaxlarla qırğızları bir-birinə qarşı qoymağa çalışır və tarixi faktların saxtalaşdırılmasına əsaslanır.
Crossmedia.az məsələ ilə bağlı fəlsəfə doktoru Faiq Ələkbərlidən açıqlama alıb. O qeyd edib ki, son zamanlar Rusiya Federasiyası Türk dövlətlərinə qarşı yeni bir həmləyə başlayıb: "Bu həmlənin əsas məqsədi türk xalqlarını bir-birinə qarşı qoymaq, regiondakı azsaylı tərəfdarlarını ayağa qaldırmaq və beləliklə, bölgədə təsir imkanlarını artırmaqdır. Bu siyasət yalnız Azərbaycanda deyil, Gürcüstanda, Ukraynada, Qazaxıstanda, Qırğızıstanda, Özbəkistanda və digər türk coğrafiyalarında da müşahidə olunur.
Rusiya yenə də Çar Rusiyası dövründə tətbiq etdiyi "parçala və hökm sür" siyasətini davam etdirir. Bu kontekstdə xüsusilə qazaxlarla qırğızları bir-birinə qarşı qoymaq cəhdləri nəzərə çarpır. Guya qazaxlar bir zamanlar ruslarla birləşərək qırğızlara qarşı hərbi və siyasi zərbələr endiriblər. Bu kimi iddialar tamamilə təxribat xarakterlidir və məqsəd iki qardaş xalq arasında düşmənçilik toxumu səpməkdir".
Onun sözlırinə görə, Qırğızıstan Prezidenti Sadır Japarovun bu məsələyə münasibəti isə çox təqdirəlayiqdir: "O, açıq şəkildə bildirib ki, qazaxlar və qırğızlar bu cür təxribatlara uymamalıdırlar. Japarovun bu mövqeyi onun milli ruhlu lider olduğunu, həm Çar Rusiyası, həm də Sovet İttifaqının mirasını daşıyan Rusiya Federasiyasının niyyətlərini yaxşı dərk etdiyini göstərir. Onun verdiyi bəyanatlar Türk dünyasına açıq və aydın mesajlardır.
Bu baxımdan Türk dövlətlərinin liderləri də eyni mövqedən çıxış etməli və belə təxribatlara qarşı birlik nümayiş etdirməlidirlər. Azərbaycan Respublikasının Prezidenti İlham Əliyev də daim bu məsələlərdə həssas yanaşma sərgiləyir. O, Türk dövlətlərini birliyə çağırır və Türk Dövlətləri Təşkilatını “bizim ailəmiz” adlandırır. Məhz bu baxış bucağından çıxış edən Sadır Japarov da Türk birliyini müdafiə edir və istər Rusiya, istər Çin, istərsə də Qərbdən gələn hər cür təxribatlara qarşı prinsipial mövqe nümayiş etdirir.
Bizim də yolumuz məhz bu mövqedən keçməlidir. Milli maraqları qorumaq, təxribatlara uymamaq və Türk birliyi ideyasını daim gücləndirmək".
Həmayıl Şükürlü
20:30 16.05.2025
Oxunuş sayı: 925
