PKK özünü buraxır?: Türkiyə tarixi qələbə yolunda...
Türkiyədə terrorçu təşkilat kimi tanınan PKK-nın aprelin sonuna qədər özünü buraxmaq barədə qərar verəcəyi bildirilir. Türkiyənin hakim Ədalət və İnkişaf Partiyasının (AKP) rəsmi nümayəndəsi Ömər Çelik bu ay ərzində Kürd probleminin həllində ciddi irəliləyişlər ola biləcəyini qeyd edib. Aprelin 22-də isə DEM Partiyasının nümayəndələri PKK lideri Abdullah Öcalanla görüşüblər. Məlumata görə, Prezident Rəcəb Tayyib Ərdoğan da bu qərar barədə məlumatlandırılıb. Bu hadisə Türkiyə üçün son onilliklərin ən böyük təhlükəsizlik və siyasi çağırışlarından birinə qarşı tarixi dönüş nöqtəsi ola bilər. Əgər PKK doğrudan da silahı buraxarsa və özünü buraxarsa, bu, təkcə dövlətin gücünün deyil, həm də siyasi iradənin və ardıcıl strategiyanın nəticəsi olacaq. Ərdoğan rəhbərliyi dövründə FETÖ Gladio və hərbi xunta kimi paralel strukturları zərərsizləşdirdikdən sonra PKK-nın da zəiflədilməsi Türkiyə üçün milli təhlükəsizlik baxımından mühüm uğurdur.
Bu barədə Crossmedia.az -a açıqlamasında Politoloq Əhəd Məmmədli bildirib ki, bu, tarixi bir hadisədir: "40-50 il ərzində Türkiyəyə qarşı digər dövlətlərdən dəstək alaraq müharibələr aparan bir terror təşkilatı qarşısında qazanılmış böyük bir qələbədir. Bu, eyni zamanda real faktdır. PKK ən ciddi zərbələri Prezident Rəcəb Tayyib Ərdoğanın prezidentliyi dövründə aldı. Ərdoğan FETÖ və hərbi xuntanın qarşısını aldıqdan, GLADİO-nu zərərsizləşdirdikdən sonra PKK-ya qarşı çox ciddi mübarizə apardı. Çünki onlar artıq o qədər həddini aşmışdılar ki, Türkiyədə ardıcıl şəkildə ciddi terror aktları həyata keçirirdilər. Hətta Türkiyənin bəzi vilayətlərində paralel bələdiyyələr qurmuşdular. Bu təhdidə qarşı Türkiyə həm ölkə daxilində, həm də Suriyada və İranda ciddi hərbi əməliyyatlara başladı. Nəticədə artıq PKK da reallığı gördü və bu mübarizənin mənasız olduğunu anladı. PKK terror təşkilatının lideri Abdullah Öcalan 20 ildən çoxdur ki, həbsdədir. O, bu vəziyyətdən – yəni “Öcalan kartı”ndan istifadə edərək PKK-nı kapitulyasiyaya imza atmağa məcbur edə bildi. PKK özünü buraxarsa, bu, Türkiyə üçün tam və tarixi bir qələbə olacaqdır".
Fidan Xəlilova
16:14 23.04.2025
Oxunuş sayı: 17595
