Şimali Kipr Türk Cümhuriyyətinin Azərbaycan tərəfdən tanınması: regional balansın açarı - AÇIQLAMA
Son dövrlər Şərqi Aralıq dənizi və Orta Asiya regionunda baş verən diplomatik proseslər yeni siyasi suallar doğurur. Xüsusilə də Orta Asiyadakı bəzi türk dövlətlərinin Yunan Kiprində səfirlik açması və eyni zamanda Şimali Kipr Türk Cümhuriyyətinə münasibətdə hələ də rəsmi addım atmaması ziddiyyət yaradır. Azərbaycan bu məsələdə hər zaman prinsipial yanaşma nümayiş etdirib və son hadisələr göstərir ki, bu mövqe getdikcə daha da strateji əhəmiyyət qazanır.
Mövzu ilə bağlı politoloq Oqtay Qasımov Crossmedia.az saytına açıqlamasında bildirib ki, Şimali Kipr Türk Cümhuriyyəti prezidentinin türk dövlətlərinə müraciəti əlbəttə ki, ciddi bir məsələdir: “Nəzərə alsaq ki, bir neçə gün öncə Orta Asiyanın bəzi türk cümhuriyyətləri Yunan Kiprində səfirlik açıblar, təbii ki, Türk Dövlətləri Təşkilatına üzv olan dövlətlərin belə bir addım atması müəyyən suallar yaradır. Bunun zərərinin qarşılanması üçün ən azından bu dövlətlərin həm də Quzey Kiprdə səfirliyi açmaları məntiqli olardı. Azərbaycan bu məsələlərdə prinsipial mövqedədir, hər zaman Quzey Kipr Türk Cümhuriyyəti xalqının mübarizəsini dəstəkləyir və onun tanınmasına çalışır. Bunu da ADA Universitetində keçirilən beynəlxalq forumda Prezident İlham Əliyev səsləndirdi. Eyni zamanda nümunəvi bir addım ataraq Antalya Diplomatik Forumunda da ilk görüşdüyü şəxs Quzey Kipr Türk Cümhuriyyətinin Prezidenti cənab Ersin Tatar oldu".
Politoloq qeyd edib ki, Quzey Kipr Türk Cümhuriyyətinin tanınması və səfirliyin açılması məsələsi çox da uzaq perspektivdə deyil, yəni Azərbaycan yaxın gələcəkdə bu addımı ata bilər: "Bu addımın atılması da Quzey Kipr Türk Cümhuriyyətinin beynəlxalq səviyyədə tanınması baxımından önəmli addım olar, eyni zamanda Türk Dövlətləri Təşkilatının özünün də bu məsələdə aktiv rol almasına təkan verəcək bir hadisə olardı".
Aydan Quliyeva
19:16 14.04.2025
Oxunuş sayı: 27587
