Xüsusi Xidmət orqanlarının peşə bayramı: "Vətəndaşların təhlükəsizliyini qorumaq üçün böyük risklərə sinə gərirlər”
Azərbaycanda dövlət və təhlükəsizlik orqanları ölkənin sabitliyinin və vətəndaşların təhlükəsizliyinin təmin olunmasında mühüm rol oynayır. Hər il martın 28-i bu qurumların əməkdaşları üçün xüsusi əhəmiyyət daşıyır, çünki həmin gün onların peşə bayramı qeyd olunur. Bu il isə Azərbaycanın təhlükəsizlik orqanlarının yaradılmasının 106-cı ildönümüdür.
Bu dövr ərzində xidmət orqanları ölkənin milli təhlükəsizliyinin qorunması, cinayətkarlıq və terrorçuluqla mübarizə istiqamətində mühüm nailiyyətlər əldə ediblər. Onlar illərlə müxtəlif çətinliklərlə üzləşsələr də, vəzifələrini şərəflə yerinə yetirərək dövlətçiliyin möhkəmləndirilməsində əhəmiyyətli rol oynayıblar. Bu barədə Crossmedia.az -açıqlamasında Milli Məclisin Deputatı Tahir Rzayev bildirib ki, Dövlət Təhlükəsizlik və Xüsusi Xidmət Orqanları İşçiləri cəmiyyət üçün çox vacib bir sahənin xidmətçiləridir:
“Dövlətin mənafeyinin qorunması, asayişin təmin edilməsi və təhlükəsizliyin təmin olunması xidmət orqanlarının əsas vəzifələridir. Buna görə də onların xidməti yüksək qiymətləndirilməlidir. Bu peşə böyük məsuliyyət tələb edir, çünki bu vəzifədə olmaq həm də təhlükəlidir. Nəzərə almaq lazımdır ki, onlar hər an cinayətkarlar, düşmənlər və vətənə xəyanət edən insanlarla qarşılaşa bilərlər. Bununla yanaşı, bu peşə şərəflidir. Xüsusi xidmət orqanlarının əməkdaşları ölkənin və vətəndaşların təhlükəsizliyini qorumaq üçün böyük risklərə sinə gərirlər”.
Deputatın sözlərinə görə, bu vəzifələri uğurla yerinə yetirmək böyük peşəkarlıq və məsuliyyət tələb edir.
“Son illərdə antiterror tədbirləri, cinayətkar qruplaşmaların zərərsizləşdirilməsi və kəşfiyyat sahəsində mühüm uğurlar əldə olunub. Bunun nəticəsində isə Azərbaycanda ictimai-siyasi sabitliyin bərpa olunmasıdır. Bu sabitlik sayəsində insanlar özlərini daha təhlükəsiz hiss edir və sərbəst hərəkət edə bilirlər”.
Fidan Xəlilova
12:58 28.03.2025
Oxunuş sayı: 12171
