Tramp dünya siyasətini necə dəyişir?- ŞƏRH
Ukraynanın 30 günlük müharibəyə hazır olmasını bildirməsindən sonra müharibənin yaxın zamanda başa çata biləcəyinə dair ümidlər artır. Çoxu bunu ABŞ Prezidenti Donald Trampın uğuru kimi qiymətləndirir. Ümumiyyətlə, o, savaşa son qoymaq üçün tələsir. Bəs bunun əsl səbəbi nədir?
Bu barədə Crossmedia.az-a danışan politoloq Elxan Şahinoğlunun sözlərinə görə, Trampın başı hələ ki, Rusiya-Ukrayna müharibəsinə qarışıb, Vaşinqton birinci mərhələdə atəşkəsə nail olmağa çalışır: "Tramp növbəti mərhələdə Yaxın Şərqlə məşğul olacaq. Asiyada da qeyri-sabitlikdir. Çinin bölgədə artan hərbi gücü, hərbi-dəniz və hərbi-hava qüvvələrinin fəallıqları müxtəlif dövlətləri narahat edir. Tramp hansısa mərhələdə bu problemlə də məşğul olmaq məcburiyyətində qalacaq. İyun ayında Trampın Çin lideri Si Cinpinlə görüşü nəzərdə tutulub. Bu arada Asiyada Çinlə Filippin arasındakı münasibətlərdə gərginlik artıb. Filippin Xarici İşlər Nazirliyi bəyanat yayaraq, Çinin Filippinin müstəqilliyinə hörmət etməsinin vacibliyini bildirib. Bəyanatda Filippinin başqa dövlətlərin deyil, özünün milli maraqlarından çıxış etdiyi yazılıb. Bundan başqa bəyanatda Çinin beynəlxalq hüquqa hörmət etməsi vacibliyi vurğulanıb".
O, Filippinin bu bəyanatının səbəbini də izah edib: " Məsələ burasındadır ki, Çinin xarici işlər naziri Van Yi bir neçə gün əvvəl keçirdiyi mətbuat konfransında Filippinin Cənub-Çin dənizindəki hərəkətlərinin müstəqil qərarlara söykənmədiyini, xarici qüvvələr tərəfindən idarə olunduğunu bildirib. Van Yi "xarici qüvvələr" dedikdə böyük ehtimalla ABŞ-ı nəzərdə tutub. Çünki Filippin son illərdə ABŞ-la hərbi əməkdaşlığı gücləndirib. Filippin ABŞ-dan müasir silahlar alacaq. Filippin ABŞ-la yanaşı Yaponiya ilə də hərbi əməkdaşlığı gücləndirib. Çünki Çinin dənizlərdə artan hərbi gücü Tokionu da ciddi narahat edir. Filippinlə Yaponiya birgə hərbi təlimlərin sayını artıracaqlarını razılaşdırıblar".
Kənan Novruzov
12:00 13.03.2025
Oxunuş sayı: 22071
