Fərdi evlərin tikintisi niyə azalıb? - EKSPERT
Ötən il Azərbaycanda ev tikintisində azalma müşahidə olunub. Belə ki, 2023-cü ildə 22 min 686 yeni yaşayış evi inşa edildiyi halda, 2024-cü ildə bu rəqəm 20 min 149-a düşüb. Nəticədə bir il ərzində tikinti sektorunda 11,2% azalma qeydə alınıb. Bəs bu azalmanın əsas səbəbləri nə ilə bağlıdır?
Mövzu ilə bağlı əmlak eksperti Elnur Azadov Crossmedia.az-a verdiyi açıqlamada tikinti həcminin azaldığını təsdiqləyib. Onun fikrincə, bir neçə səbəbi var:
"Belə ki, pandemiya dövründə fərdi evlərə tələbatın artması qiymətlərin yüksəlməsinə səbəb oldu. Bu da böyük həcmdə fərdi evlərin inşası ilə nəticələndi. Onların sənədləşməsi 2023-cü ildə qeydə alındı. Buna görə də 2024-cü ildə fərdi evlərin tikintisi əvvəlki illərlə müqayisədə azaldı. Bundan əlavə, inşaat materiallarının bahalaşması və fərdi evlərin qeydiyyatı ilə bağlı yeni qanuni tələblərin tətbiqi tikinti həcminin azalmasına təsir göstərdi".
Ekspert çoxmənzilli binaların az qeydiyyata alınmasının səbəbləri barədə də danışdı. Onun sözlərinə görə, son illər ərzində tikinti şirkətlərinə verilmiş icazələrin sayı ildən-ilə azalma göstəricisi ilə nəticələnib. Bu da öz növbəsində yeni tikilən binaların sayı kəskin azalmaqdadır.
Elnurə Kərimova
13:52 24.02.2025
Oxunuş sayı: 10039
