BMT-nin Baş katibi HƏMAS-ı qəddar adlandırdı
BMT-nin Baş katibi Antonio Quterreş HƏMAS-ı Qəzzada israilli girovların cəsədləri və tabutlarını nümayişkaranə şəkildə sərgiləyərək İsrailə təhvil verməsinə görə qınayıb.
Crossmedia.az xarici KİV-ə istinadən xəbər verir ki, o, bu barədə X sosial şəbəkəsində yazıb.
“Beynəlxalq hüquqa görə, ölənlərin qalıqlarının təhvil verilməsi qəddar, qeyri-insani və ya ləyaqəti alçaldan rəftara yol verilmədən, ölənlərin və onların ailələrinin ləyaqətinə hörmət edilməklə həyata keçirilməlidir”.
Bu açıqlama, İsrail Müdafiə Ordusunun HƏMAS tərəfindən təhvil verilən cəsədlərdən birinin Şiri Bibas və ya digər girovlara aid olmadığını bildirməsindən sonra verilib.
Lakin Quterreş bu məqamı öz müraciətində qeyd etməyib.
Xatırladaq ki, fevralın 20-də Fələstinin “HƏMAS” hərəkatı Qəzza zolağında öldürülən girovların, o cümlədən Bibas ailəsinin üzvlərinin meyitlərini İsrail tərəfinə təhvil vermişdi.
11:44 21.02.2025
Oxunuş sayı: 7242
