Sığınacaq sədrinin təhdid olunmasına nazirlik rəsmisi münasibət bildirdi
Azərbaycan Uşaqlar Birliyi-Uşaq Sığınacağı Reinteqrasiya Mərkəzinin sədri Kəmalə Ağazadə ciddi təhdidlərlə üzləşdiyini bildirib. O, sosial şəbəkələrdə paylaşım edərək, onu hədələyən şəxsin bir il əvvəl azyaşlı övladını atıb gedən ana olduğunu vurğulayıb.
Crossmedia.az xəbər verir ki, qadın 2 yaşlı uşağını dayəyə tapşıraraq yoxa çıxıb və 28 gün ərzində onunla heç bir əlaqə saxlamayıb. Dayə isə vəziyyətdən narahat olaraq qaynar xəttə müraciət edib. Nəticədə, polis əməkdaşlarının iştirakı ilə uşaq sığınacağa yerləşdirilib.
Kəmalə Ağazadənin sözlərinə görə, bu müddət ərzində naməlum şəxslər müxtəlif nömrələrdən zəng edərək özlərini uşağın qohumları kimi təqdim edib və azyaşlının təhvil verilməsini tələb ediblər. Hətta sığınacaq işçilərinə qarşı ölüm hədələri də səsləndirilib.
Son təhdid isə daha da ciddidir. İddiaya görə, ana xəbərdarlıq edib ki, əgər uşağı izahat verilmədən ona qaytarmasalar, o, canlı yayım açaraq hamının gözü qarşısında intihar edəcək və bunun məsuliyyətini Kəmalə Ağazadənin üzərinə atacaq.
Hadisənin ciddiliyini vurğulayan Ağazadə, qadının hansısa cinayətkarların təsiri altında ola biləcəyini və uşağın təhlükəli məqsədlər üçün istənilmə ehtimalını qeyd edib. O, həmçinin məsələnin hüquq-mühafizə orqanlarının diqqətinə çatdırılmasının vacibliyini bildirib.
İctimaiyyətdə ciddi rezonans doğuran mövzuyla bağlı Daxili İşlər Nazirliyinə sorğu ünvanladıq. Nazirliyin Mətbuat xidmətinin rəisi, polis polkovnik-leytenantı Elşad Hacıyev Crossmedia.az-ın sorğusuna cavab olaraq bildirib ki, məsələ araşdırma predmetidir.
P.S. İnanırıq və ümid edirik ki, məsələ araşdırılaraq müvafiq həllini tapacaq. Çünki səsləndirilən iddia çox ciddi məqamları özündə əks etdirir.
Nihat Tahirov
14:01 12.02.2025
Oxunuş sayı: 23563
