ABŞ yaxın gələcəkdə dünyanı təkbaşına idarə etmək niyyətindədir
Son illərdə ABŞ-nin Yaxın Şərq siyasətində mühüm dəyişikliklər müşahidə olunur. Xüsusilə, prezident Donald Trampın dövründə Vaşinqtonun bölgəyə yanaşması daha aqressiv və dominant xarakter alıb. ABŞ-nin Yaxın Şərqi öz maraqlarına uyğun şəkildə yenidən formalaşdırmaq cəhdləri, İsrailin bölgədəki mövqeyini gücləndirmək və İranın təsirini minimuma endirmək kimi hədəflərlə müşayiət olunur. Vaşinqton bu məqsədlərinə çatmaq üçün geosiyasi və hərbi təzyiqlərdən istifadəyə hazır görünür. ABŞ-nin bu siyasəti Yaxın Şərqdə yeni güc balansının formalaşmasına və bölgədəki mövcud münaqişələrin daha da dərinləşməsinə səbəb ola bilər.
Mövzu ilə bağlı politoloq Elçin Xalidbəyli Crossmedia.az-a açıqlama verib: “Hazırda ABŞ prezidenti Donald Trampın siyasəti ABŞ-nin dünyada hərbi-siyasi iradəsinin şərtsiz qəbuluna yönəlib. Kanadaya, NATO-ya, Meksikaya eyni zamanda Rusiyaya yönəlik sərt mövqe tutması onu göstərir ki, ABŞ yaxın gələcəkdə dünyanı təkbaşına idarə etmək niyyətindədir. Bütün bunları nəzərə alanda ABŞ-nin Yaxın Şərqi də öz maraqlarına uyğun dizayn ediləcəyi nəticəsinə gəlirik”.
Politoloq ABŞ-nin yeni Yaxın Şərq dizaynı planında İsrailin tutacağı mövqedən danışıb: “ABŞ-nin əsas hədəflərindən biri Yaxın Şərqin yenidən dizayn olunmasıdır. ABŞ-nin yeni Yaxın Şərq planında İsrailin maksimum səviyyədə dəstəklənməsi və hegemon dövlət statusunda qalması ön planda yer alır. Yaxın Şərqə İranın təsir mexanizmlərinin zəiflədilməsi və ümumiyyətlə sıradan çıxarılması da xüsusi hədəflər sırasında yer alır. Xüsusilə də Trampın İrana yönəlik son təhdidləri belə düşünməyə əsas verir ki, Ağ Ev növbəti mərhələdə İranla müəyyən qarşıdurmaya cəhd göstərəcək. Bu qarşıdurmanın nəticəsində İranın Yaxın Şərqdə təsirsiz dövlətə çevrilməsinə yönəlik müəyyən planlar var. Bütün bunlar onu göstərir ki, ABŞ-nin Yaxın Şərq siyasəti yenidən formalaşdırılır”.
Ayhan Ağarzayev
18:23 11.02.2025
Oxunuş sayı: 11014
