WB: Avropa və Mərkəzi Asiyada kapitalla yanaşı texnoloji inkişaf lazımdır
Avropa və Mərkəzi Asiya ölkələrində dayanıqlı iqtisadi artım üçün təkcə investisiyaların cəlb edilməsi deyil, həm də texnologiyaların aktiv şəkildə uyğunlaşdırılması və yayılması vacibdir.
Bunu Dünya Bankının (WB) Avropa və Mərkəzi Asiya regionu üzrə baş iqtisadçısı İvaylo İzvorski qurumun 2024-cü il üzrə "Dünyanın İnkişafı haqqında Hesabat"ının təqdimatında bildirib.
"Mərkəzi Asiya ölkələrinin bir çoxunda dövlət müəssisələrinin 70-80 %-i pərakəndə ticarət kimi rəqabətli sektorlarda fəaliyyət göstərir. Bu, özəl biznesin inkişafını ləngidir. Maliyyələşdirmə də əsas rol oynayır. Əgər uzunmüddətli kapitala çıxış məhduddursa və ya maliyyə sistemi əmanətçilərlə borc alanlar arasında resursları səmərəsiz bölüşdürürsə, biznesin genişlənməsi mümkün olmur", - o qeyd edib.
İ.İzvorski vurğulayıb ki, Avropa və Mərkəzi Asiyada kiçik müəssisələrin sayında çoxluq müşahidə olunur: "Əgər şirkətlər böyümürsə, onlar xarici texnologiyaları tətbiq edə bilmir və innovasiyalar üçün lazımi miqyasa malik olmurlar. Bu, çox vaxt kiçik daxili bazarlarla əlaqədardır, ona görə də qlobal iqtisadiyyata və regional bazarlara inteqrasiya kritik əhəmiyyət kəsb edir. Regiondakı bir çox müəssisələr yaradıldıqdan beş il sonra belə kiçik olaraq qalır".
Dünya Bankının baş iqtisadçısı, həmçinin regionlar arasında rəqabət mühitindəki fərqi vurğulayıb. Onun fikrincə, yüksək gəlirli kateqoriyaya uğurla keçid etmiş Mərkəzi Avropa ölkələrində rəqabət yüksək olaraq qalır. O bildirib ki, Qafqaz və Mərkəzi Asiya ölkələrində isə rəqabət əhəmiyyətli dərəcədə aşağıdır.
"Yüksək gəlir səviyyəsinə nail olmuş dövlətlər 2 əsas mərhələdən keçib: əvvəlcə investisiya artımı, sonra innovasiya. Avropa və Mərkəzi Asiya ölkələrinin əksəriyyəti hazırda 2-ci mərhələdədir. Onlar təkcə investisiyalar cəlb etməməli, həm də texnologiyaları uyğunlaşdırmalıdırlar. Maliyyələşdirmə problemi, xüsusilə vençur kapitalı problemi də qalır. Banklar çox vaxt risklərdən qaçır, innovativ layihələr isə ilk növbədə yüksək dərəcədə qeyri-müəyyənliklə bağlı olur", - ekspert yekunlaşdırıb.
12:19 10.02.2025
Oxunuş sayı: 7423
