Məhbus mübadiləsindən sonra azad edilən fələstinli İsrailin hava zərbəsində həlak oldu
İsraillə məhbus mübadiləsi nəticəsində azad edilmiş fələstinli Abdul Hadi İssam Alavne işğal altındakı İordan çayının Qərb sahilində İsrailin hava zərbəsi nəticəsində həlak olub.
Crossmedia.az xarici KİV-ə istinadən xəbər verir ki, Alavne şənbə axşamı Jenin şəhərinin cənubunda yerləşən Qabatiya qəsəbəsində İsrailin hava hücumu zamanı öldürülüb.
Onun ölümü bazar günü Həmas tərəfindən idarə olunan Məhbuslar üzrə Media Ofisi tərəfindən təsdiqlənib.
Alavne ilə yanaşı, daha bir fələstinli də həmin hava hücumu nəticəsində həyatını itirib. Alavne 2023-cü ilin noyabrında Həmasla İsrail arasında məhbus mübadiləsi çərçivəsində İsrail həbsxanasından azad edilmişdi.
İsrail ordusu yanvar ayının ortalarında Qəzzada Həmasla atəşkəs razılaşmasına gəldikdən sonra işğal altındakı Qərb sahilində, xüsusilə də Jenin və onun qaçqın düşərgəsi ətrafında reydlərini intensivləşdirib.
Bazar günü İsrail qüvvələri Jenin şəhərində çoxsaylı partlayışlar həyata keçirib və bir yaşayış məhəlləsində təxminən 20 evi dağıdıb.
Yanvarın 21-də İsrail ordusunun “Dəmir Divar” əməliyyatına başlamasından bəri, əksəriyyəti Jenin bölgəsində olmaqla, Qərb sahilində azı 27 fələstinli öldürülüb.
Nihat Tahirov
02:59 03.02.2025
Oxunuş sayı: 2594
