BRİKS ölkələri dolları əvəzləmək istəyir – mümkün ola bilərmi?
ABŞ Prezidenti Donald Tramp BRİKS ölkələrinin qlobal ticarətdə ABŞ dollarına alternativ valyuta yaratmaq planlarına qarşı sərt mövqe sərgiləyib. O, belə bir addım atılacağı təqdirdə BRİKS ölkələrindən idxal olunan məhsullara 100% gömrük rüsumu tətbiq ediləcəyini bəyan edib.
Mövzu ilə bağlı Crossmedia.az-a açıqlama verən iqtisadçı Natiq Cəfərov bildirib ki, BRİKS ölkələri əvvəlcə daxili valyutalarla ticarəti genişləndirmək qərarına gəlsələr də, bu proses uğurlu olmayıb: “Çünki BRİKS ölkələrinin qarşılıqlı ticarət dövriyyəsində dolların rolu olduqca yüksəkdir”. Daha sonra BRİKS-in ortaq valyutasının yaradılması məsələsinin müzakirəyə çıxarıldığını vurğulayan iqtisadçı qeyd edib ki, əvvəlcə bu valyuta elektron formada nəzərdə tutulsa da, sonradan ortaq valyuta variantı da müzakirə olunub.
Lakin bəzi ölkələrin, xüsusilə Hindistan və Braziliyanın bu ideyaya qarşı çıxdığını bildirən Cəfərov, səbəbi belə izah edib: “Hindistanın ticarət dövriyyəsinin böyük hissəsi dollara əsaslanır və digər ölkələrlə aparılır. Braziliya da bu təklifə qarşı çıxdı. Buna görə də düşünürəm ki, belə bir məsələnin yaxın vaxtlarda həllini tapması çətin görünür”.
İqtisadçı əlavə edib ki, BRİKS ölkələrinin ABŞ ilə ticarət dövriyyəsi, öz aralarındakı dövriyyədən daha yüksək olduğu üçün ortaq valyutanın reallaşması yaxın perspektivdə mümkün deyil: “Tramp sadəcə olaraq əvvəlcədən xəbərdarlıq edir ki, bu mövzuda hər hansı danışıqlar və ya müzakirələr aparılmamalıdır. ABŞ yaxşı bilir ki, bütün BRİKS ölkələri üçün ABŞ ilə ticarət əlaqələri, öz aralarındakı ticarətdən daha vacibdir”.
Beləliklə, ekspertlərin fikrincə, BRİKS-in ortaq valyuta yaratmaq planlarının yaxın gələcəkdə reallaşması çətin görünür.
Nihat Tahirov
13:07 01.02.2025
Oxunuş sayı: 9948
