ABŞ-ın yeni administrasiyası ölkədə İsrailin “Dəmir Qübbə” sisteminə bənzər raketdən müdafiə sisteminin yaradılması, Pentaqonda müxtəliflik proqramlarının dayandırılması və COVID-19 peyvəndindən imtina etdiyinə görə ordudan tərxis olunan hərbçilərin bərpasını nəzərdə tutan fərmanlar hazırlayır.
Crossmedia.az xəbər verir ki, bu barədə ABŞ-ın yeni müdafiə naziri Pit Heqset Pentaqona gəlişi zamanı jurnalistlərə açıqlamasında bildirib.
“Bu gün əlavə fərmanların qəbul ediləcəyi gözlənilir və biz bunu tam dəstəkləyirik”, - deyə Heqset vurğulayıb. Onun sözlərinə görə, sərəncamlar ABŞ Müdafiə Nazirliyində müxtəliflik, bərabərlik və inklüzivlik (DEI) proqramlarının ləğvini, COVID-19 ilə bağlı məhdudiyyətlər səbəbindən ordudan uzaqlaşdırılan hərbçilərin bərpasını və ölkədə yeni raketdən müdafiə sisteminin yaradılmasını əhatə edəcək.
“Bu, tez bir zamanda həyata keçiriləcək,” - deyə nazir bildirib və fərmanların icrasını qısa zamanda təmin edəcəyini vurğulayıb.
Eyni zamanda, Heqset-ə 2021-ci ildə ABŞ qüvvələrinin Əfqanıstandan çıxarılması ilə bağlı sual ünvanlanıb. O, bu məsələ ilə bağlı “hesab verməyə hazır olduğunu” qeyd edib.
