Mask almanlara: “Keçmişə görə özünüzü çox da narahat etməyin”
Milyarder və Donald Trampın tərəfdarı Elon Mask Almaniyanın sağçı partiyası olan “Almaniya üçün Alternativ” (AfD) partiyasının seçkiqabağı qurultayında videobağlantı vasitəsilə çıxış edib.
Crossmedia.az xəbər verir ki, Mask bildirib ki, qarşıdan gələn Almaniya seçkiləri yalnız bu ölkənin deyil, bütün Avropanın, hətta dünyanın və sivilizasiyanın gələcəyini müəyyən edə bilər. O, hər bir xalqın öz milləti və mədəniyyəti ilə fəxr etməsinin vacibliyini vurğulayıb və insanların öz ənənələrindən utanmamalı olduğunu qeyd edib.
Maskın fikrincə, nəsillər öz əcdadlarının hərəkətlərinə görə məsuliyyət daşımamalıdır. O, almanları qədim bir xalq kimi xarakterizə edərək, hətta Yuli Sezarın onları güclü döyüşçülər kimi təsvir etdiyini xatırladıb. Mask əlavə edib ki, bu gün Almaniyada həddən artıq diqqət günah hissinə yönəldilir və bu yanaşmanı dəyişməyin vaxtı gəlib çatıb.
Çıxışını “Almaniyanın böyük gələcəyi üçün mübarizə aparın” çağırışı ilə yekunlaşdıran Maskın sözləri qurultayda iştirak edən 4500 nəfər tərəfindən alqışlarla qarşılanıb.
Gültac Mehdizadə
02:00 27.01.2025
Oxunuş sayı: 10947
