Abxaziyadakı erməni icması hökumətə müraciət edib
Erməni icmasının nümayəndələri Abxaziyadakı vəziyyətlə bağlı narahatlıqlarını ifadə edərək, Ermənistanın Diaspor İşləri üzrə Müvəkkili Zareh Sinanyanın vasitəsilə hökumətə müraciət ediblər.
Crossmedia.az xəbər verir ki, onlar Ermənistan hökumətindən tanınmamış Abxaziya Respublikasının, hətta müvəqqəti hakimiyyət nümayəndələrinə rəsmi müraciət edərək, erməni əhalisinin müdafiəsinin gücləndirilməsi üçün əlavə tədbirlər görülməsini xahiş ediblər.
Erməni icmasının bəyanatına görə, Abxaziyada fəaliyyət göstərən siyasi müxalifət Türkiyənin radikal millətçi qrupları və xüsusi xidmət orqanları ilə sıx əməkdaşlıq edir. Bildirilir ki, müxalifət yerli erməniləri hakimiyyətə gəlmək yolunda maneə hesab edir və bununla əlaqədar “qara siyahılar” tərtib edir, ermənilərə qarşı təxribatlar planlaşdırır.
Müraciət müəllifləri iddia edirlər ki, bu fəaliyyətlərin nəticəsi olaraq ermənilərə qarşı zorakılıq və pogromların baş verməsi istisna edilmir.
Onların fikrincə, təzyiqlərin əsas təşəbbüskarları Abxaziyanın Suverenliyinin Müdafiəsi Komitəsinin sədri Levan Mikaa və Abxaziyanın Xalq Hərəkatının rəhbəri, prezidentliyə namizəd Adqur Ardzınbadır.
Gültac Mehdizadə
01:40 27.01.2025
Oxunuş sayı: 10228
