Ukraynanın Kursk əməliyyatı: Rusiya üçün alçaldıcı məğlubiyyət?
Rusiyanın Kursk vilayətinin əldə saxlanılması Ukraynaya sülh danışıqları zamanı mövqeyini gücləndirmək baxımından böyük üstünlük qazandıra bilər.
Crossmedia.az xarici KİV-ə istinadən xəbər verir ki, Ukrayna ordusu avqust ayında Kursk vilayətinə irəliləməyə qərar verib: "Onlar qəsdən qiymətli resursları və silahları sərf edərək Rusiyanın qüvvələrini yayındırmağa, bufer zona yaratmağa, təşəbbüsü ələ almağa və gələcək danışıqlarda "kozır" rolunu oynaya biləcək ərazi və əsirlər əldə etməyə çalışıblar. Kurska doğru irəliləyiş cəbhə xəttinin aylarla dəyişməz qaldığı müharibədə gözlənilməz bir addım olub.
Lakin bu əməliyyatın nəticələri birmənalı olmayıb. Bir çox hərbi ekspertlər bu addımı strateji baxımdan əsaslandırılmış hesab etsələr də, Ukrayna qüvvələri ələ keçirilmiş əraziləri saxlamaqda çətinliklərlə üzləşiblər. Analitiklər bildirirlər ki, bu, ağıllı addım idi, lakin Ukraynadakı cəbhə xəttinə olan təzyiqi əhəmiyyətli dərəcədə zəiflətmədi”.
Bildirilb ki, hazırda Ukrayna Rusiya ərazisinin bir hissəsini nəzarətdə saxlayır:
"Müdafiə eksperti və Böyük Britaniyanın kimyəvi, bioloji, radioloji qüvvələrinin keçmiş komandanı Hamish de Bretton-Qordon qeyd edib ki, Kursk vilayətinə nəzarət edən tərəf atəşkəs danışıqlarında üstün mövqeyə sahib olacaq". ABŞ-nin yeni Prezidenti Donald Trampın siyasi səhnəyə qayıdışı sülh danışıqları üçün yeni ümidlər yaradıb. Tramp dəfələrlə müharibəni danışıqlar yolu ilə bitirə biləcəyini bildirib. Bu həftə o, Rusiyaya daha böyük iqtisadi təzyiqlər göstərməyi və onu razılaşmaya məcbur etməyi planlaşdırdığını açıqlayıb.
Ukrayna Prezidenti Volodimir Zelenski də Rusiyanın nəzarətində olan digər ərazilərin “diplomatik yollarla” geri qaytarıla biləcəyini vurğulayıb".
Müharibə Araşdırmaları İnstitutunun eksperti Corc Barros bildirir ki, Rusiyanın öz ərazisi ilə bağlı danışıqlar aparması Prezident Volodimir Putin üçün böyük alçaldıcı hadisə və buna görə də Kreml bu ərazini qorumaq üçün daha çox qüvvə cəmləyə bilər.
Qeyd edək ki, Rusiya-Ukrayna müharibəsi 2022-ci il fevralın 24-də başlayıb. ABŞ Prezidenti Donald Tramp daha əvvəl müharibəni bu il bitirmək üçün çalışacağını deyib. Ukrayna lideri Volodimir Zelenski isə söyləyib ki, 2025-ci ildə savaşa son qoymaq üçün mümkün olan hər şeyi edəcək.
Fatimə Məmmədova
20:02 26.01.2025
Oxunuş sayı: 9544
