İspaniya və Portuqaliyada turist axınına qarşı narazılıq artır
İspaniya və Portuqaliya sakinləri həddindən artıq turist axınından narazıdır. Hər il rekord sayda turist qəbul edən bu iki Aralıq dənizi ölkəsində insanlar, əsasən turistlər üçün icarəyə verilən mənzillərin yerləşdiyi binalarda yaşamağın çətinliyindən şikayətlənir.
Crossmedia.az xəbər verir ki, The Guardian qəzetinə danışan, Lissabonda Airbnb kimi platformalar vasitəsilə hər mənzilin turistlərə icarəyə verildiyi binada yaşayan 71 yaşlı portuqaliyalı Aleks özünü xəyalət şəhərdə yaşayırmış kimi hiss etdiyini bildirib. O deyib: "Çox insan var, amma heç kimi tanımıram. Şəkərə ehtiyacım olsa və ya təcili bir vəziyyətlə qarşılaşsam qapısını döyəcəyim heç kim yoxdur." Aleks bu vəziyyətə dözməkdə çətinlik çəkdiyini və başqa bir bölgəyə köçməyi planlaşdırdığını qeyd edib.
Bitməyən şikayətlər
Lissabonda yaşayan 43 yaşlı Joao Pova da eyni narazılığı ifadə edib. İki turist mənzilinin arasında yaşadığını deyən Pova, vəziyyəti belə izah edib: "Qonşular təxminən 10 il əvvəl getməyə başladılar. İndi hər şey tamamilə fərqlidir. Düzü, heç kimi tanımırsınız. Sanki oteldə yaşayırsınız."
Barselonada isə on ildən çoxdur ki, iki turist mənzilinin altında yaşayan 69 yaşlı Ester, illərdir gecə saat 03:00-dan sonra belə davam edən partiləri dayandırmaq üçün polisə müraciət etdiyini və artıq yerli hüquq-mühafizə orqanları tərəfindən tanındığını bildirib. İspan qadın turistlərin binanın ətrafında qırıq şüşələr buraxmasına, pilləkən boşluğuna təcili ehtiyaclarını ödəməsinə əsəbiləşdiyini qeyd edib.
Referendum çağırışı
Hər iki ölkənin sakinləri daimi olaraq turistlərin çamadan və təmizlik arabaları səbəbindən sıradan çıxan liftlərdən, gecə yarısına qədər davam edən partilərdən və səs-küydən, binanın ümumi sahələrində dolaşan naməlum şəxslərdən bezib. Bu vəziyyət vətəndaşların hərəkətə keçməsinə səbəb olub. Lissabonda 6 600-dən çox insan, şəhər mənzillərində turistlərə icarəyə verilən mənzillərin qadağan edilməsi ilə bağlı referendum çağırışına imza atıb.
Nihat Tahirov
15:18 26.01.2025
Oxunuş sayı: 3183
