Konyada çökən binanın dağıntılarının təmizlənməsi başa çatdı
Konyanın Selçuklu rayonunun Selçuk məhəlləsində yerləşən dörd mərtəbəli binada baş verən çöküşdən sonra aparılan axtarış-xilasetmə işləri tamamlanıb. Hadisə nəticəsində 2 nəfər həyatını itirib, 3 nəfər isə yaralı olaraq xilas edilib.
Crossmedia.az xəbər verir ki, Beyşehir prospektində yerləşən bina dünən axşam saatlarında qəflətən çöküb. Dağıntılar altında qalan insanların xilas edilməsi üçün dərhal axtarış-xilasetmə işlərinə başlanılıb. Xilasedicilər dağıntılar altından iki nəfərin cəsədini çıxarıb, üç nəfəri isə yaralı vəziyyətdə xilas edərək xəstəxanaya çatdırıblar.
DAĞINTILARIN TƏMİZLƏNMƏSİ TAMAMLANIB
Xilasetmə işlərinin başa çatmasından sonra dağıntıların təmizlənməsinə başlanılıb. Çoxsaylı qruplar iş texnikalarından istifadə edərək dağıntıları yük maşınlarına yükləyib və ərazidən uzaqlaşdırıb. Çökmüş binanın yerində böyük bir boşluq yaranıb.
Hadisənin səbəbləri ilə bağlı araşdırmalar davam edir. Rəsmilər ətrafdakı digər binaların da təhlükəsizlik vəziyyətini yoxlayacaqlarını bildiriblər.
Nihat Tahirov
03:44 26.01.2025
Oxunuş sayı: 2556
