Məhkəmə Prezident Yun üçün həbs müddətinin uzadılmasını rədd edib
Seul Mərkəzi Rayon Məhkəməsi Prezident Yun Suk-Yeolun həbs müddətinin uzadılması ilə bağlı prokurorluğun müraciətini geri qaytarıb.
Crossmedia.az xəbər verir ki, məhkəmə, hərbi vəziyyət elanından sonra üsyan təşkil etməkdə şübhəli bilinərək saxlanılan Prezident Yun Suk-Yeolun həbs müddətinin uzadılması üçün prokurorluğun ikinci müraciətini də rədd edib. Prokurorluq yanvarın 24-də Prezidentin həbs müddətini fevralın 6-na qədər uzatmaq üçün məhkəməyə müraciət etsə də, məhkəmə bu tələbi qəbul etməyib. Səbəb kimi isə Korrupsiyaya Qarşı Mübarizə Bürosunun apardığı istintaqın tamamlanması üçün xüsusi ehtiyacın olmaması göstərilib.
Qeyd edək ki, Prezident Yun Suk-Yeol dekabrın 3-də elan olunan hərbi vəziyyətlə bağlı başladılan istintaq çərçivəsində yanvarın 15-də saxlanılıb. Prezident Korrupsiyaya Qarşı Mübarizə Bürosunun istintaqı zamanı suallara cavab verməkdən imtina edib və öz həbsi ilə istintaqı qanunsuz hesab edib. İstintaq qrupu onu həmçinin hərbi personalı parlamentin fəaliyyətini pozmaq məqsədilə Milli Məclisə göndərməklə səlahiyyətlərini aşmaqda da şübhəli bilir.
Məsələ ilə bağlı istintaqın davam etdiyi bildirilir.
Nihat Tahirov
22:32 25.01.2025
Oxunuş sayı: 3657
