Kurskda döyüş meydanı: Ukrayna ordusu ciddi itkilərlə üzləşdi
Ukrayna Kursk bölgəsində son sutkada 360-dan çox hərbçisini itirib, beş əsgər isə təslim olub. Bu barədə Rusiya Müdafiə Nazirliyinin açıqlamasında bildirilib.
“Son sutka ərzində Ukrayna Silahlı Qüvvələri 360-dan çox hərbçisini itirib. Bir tank, doqquz zirehli döyüş maşını, 27 avtomobil, bir özüyeriyən artilleriya qurğusu, iki minaatan və bir radioelektron mübarizə sistemi məhv edilib. Altı pilotsuz uçuş aparatının idarəetmə məntəqəsi və bir sursat anbarı sıradan çıxarılıb. Beş Ukrayna hərbçisi təslim olub,” - deyə açıqlamada qeyd olunur.
Crossmedia.az TASS xəbər agentliyinə istinadən xəbər verir ki, Nazirliyə görə, “Mərkəz” döyüş qrupunun bölmələri Viktorovka, Zaolyoshenka, Kositsa, Kurilovka, Lebedevka, Malaya Loknya, Maxnovka, Mirnıy, Nikolayevka, Nikolayevo-Daryino, Nikolsky, Novaya Soroçina, Sverdlikovo, Sudja və Çerkasskoye Poreçnoye yaşayış məntəqələrində Ukrayna tank briqadası, ağır mexanikləşdirilmiş briqada, dörd mexanikləşdirilmiş briqada, iki desant briqadası, bir dəniz piyadaları briqadası və üç ərazi müdafiə briqadasını məğlub edərək hücum əməliyyatları həyata keçirib.
Bundan əlavə, taktiki və ordu aviasiyası, artilleriya qüvvələri Guyevo, Dmitryukov, Zazulevka, Kazachnya Loknya, Kruglenkoye, Loknya, Melovoy, Nikolayevo-Daryino, Oleşnya, Sverdlikovo, Staraya Soroçina və Yujnıy yaşayış məntəqələrində, həmçinin Sumı bölgəsindəki Basovka, Belovody, Juravka, Miropolye və Yunakovka yaxınlığında düşmənin şəxsi heyətini və texnikasını məhv edib.
Maral Şahverdili
22:17 25.01.2025
Oxunuş sayı: 9332
