“Ermənistan iqtisadiyyatında böyük təlatümlər gözlənilir”- Ekspert
Ermənistan Xarici Kəşfiyyat Xidməti bildirib ki, Avropa İttifaqının (Aİ) İran və Rusiyaya qarşı sanksiyaları bu ölkənin iqtisadiyyatı üçün çağırışdır.
Məlumata görə, Ermənistan üçün əlavə risk anti-Rusiya sanksiyaları səbəbindən Rusiya iqtisadiyyatının artımının mümkün ləngiməsidir. Xarici Kəşfiyyat Xidməti hesab edir ki, göstərilən ölkələrə qarşı sanksiyaların yumşaldılması və ya ləğv edilməsi ölkə iqtisadiyyatına müsbət təsir göstərə bilərdi.
Məsələ ilə bağlı Crossmedia.az-a açıqlama verən iqtisadçı- ekspert, REAL partiyasının sədri Natiq Cəfərli bildirib ki, Ermənistan Rusiyaya sanksiyalardan yan keçməyə kömək edən dünyada ən vacib beş dövlətdən biridir: “Hətta bəzi mal növləri üzrə ilk üçlükdə yer alır.
Ona görə də Aİ və ABŞ-nin Rusiyaya qarşı sanksiyalarında sərt qərarlar alınsa, bu, Ermənistan iqtisadiyyatında çox böyük təlatümlər yaradacaq. Çünki bu gün Ermənistan iqtisadiyyatı Rusiyaya reeksport üzərində inşa edilib. Rusiyaya olan ixracat və ticarət dövriyyəsi ümumilikdə 14 milyard dollara çatıb. Halbuki müharibə başlayanda cəmi 2022-ci ildə cəmi iki milyard dollardan bir az çox idi. Yəni az qala yeddi dəfə artım göstərib. Bu da məhz onun nəticəsidir.”
Nərgiz Camalzadə
16:50 23.01.2025
Oxunuş sayı: 4545
