Starship-in yeni sınağı: Göy üzündə parçalanma ilə nəticələndi
Amerikalı milyarder İlon Maskın rəhbəri olduğu SpaceX şirkətinin Ay və uzaq kosmosa səyahət məqsədilə hazırladığı Starship raketi, 7-ci sınaq uçuşunda parçalanıb. Raket startdan qısa müddət sonra texniki nasazlıq səbəbilə göy üzündə dağılıb.
SpaceX-dən verilən açıqlamaya görə, uçuş zamanı raketlə əlaqə kəsilib və “planlaşdırılmamış sürətli parçalanma” baş verib. Hadisənin Meksika Körfəzi və ya Karib dənizi üzərində baş verdiyi və nəticədə raketin qalıqlarının həmin ərazilərə düşdüyü bildirilib.
İlon Mask hadisə ilə bağlı X platformasında paylaşım edərək, “Uğur qeyri-müəyyəndir, amma əyləncə zəmanətlidir!” deyə zarafat edib. O, baş verənlərin səbəbini “yanacaq sızması” və “artıq təzyiq” olaraq izah edib.
Raketin Texasdan qalxaraq, Meksika Körfəzi üzərindən Atlantik okeanını keçməsi və Hind okeanına enməsi planlaşdırılırdı. Lakin texniki problemlər səbəbilə uçuş başa çatmadan dayanıb.
ABŞ Federal Aviasiya Administrasiyası (FAA) hadisə ilə bağlı qısa müddətlik məhdudiyyət tətbiq etdiklərini açıqlayıb. Raketdə heyət üzvü olmadığı üçün insan itkisi olmayıb.
Starship raketinin istehsal dəyərinin təxminən 100 milyon dollar olduğu bildirilir. SpaceX, təkrar istifadə imkanlarını artırmaq və xərcləri azaltmaq üçün layihədə dəyişikliklər etməyi planlaşdırır.
SpaceX mühəndisləri dizaynda bəzi təkmilləşdirmələr ediləcəyini bildirib. Hadisənin səbəbləri araşdırılır.
Sevinc Abuşova
19:50 18.01.2025
Oxunuş sayı: 7944
