"BYD" Səviyyə 2+ avtonom idarəetmə xüsusiyyətlərinə çıxışı genişləndirməyi hədəfləyir
"BYD", 2025-ci ilə qədər bütün elektrikli avtomobil modellərində inkişaf etmiş avtonom idarəetmə xüsusiyyətləri təqdim edərək sektoru silkələməyə hazırlaşır. Şirkətin bu iddialı addımı, ən münasib qiymətə malik modeli olan "BYD Seagull"u belə əhatə edəcək.
Çindən gələn məlumatlara görə, "BYD" son iki il ərzində proqram təminatı və avtonom idarəetmə texnologiyalarına ciddi sərmayə yatırıb. Şirkət 1300 nəfərlik Sürücü Dəstək Sistemləri ("ADAS") və ağıllı idarəetmə komandası yaradıb. "ADAS" texnologiyasının inkişafına təxminən 13,6 milyard dollar vəsait ayrılıb.
"BYD" əsasən yuxarı seqment və ya lüks avtomobillərdə olan Səviyyə 2+ avtonom idarəetmə xüsusiyyətlərinə çıxışı genişləndirməyi hədəfləyir. Bu çərçivədə şirkət bu funksiyaları məhsul çeşidinin hamısında istifadəyə təqdim edərək "ADAS" və ağıllı idarəetmə texnologiyalarını bütün müştərilərinə əlçatan etmək istəyir.
Şirkətin "DiPilot" adını verdiyi "ADAS" sistemi üç fərqli səviyyədə təqdim olunacaq: "DiPilot 100", "DiPilot 300" və "DiPilot 600". Giriş səviyyəli "DiPilot 100" əsas naviqasiya funksiyalarına malikdir, "DiPilot 300" və "DiPilot 600" isə yarı avtonom idarəetmə, şəhər avtonom idarəetməsi və Səviyyə 3 idarəetmə qabiliyyətləri təqdim edir.
"BYD"-nin "ADAS" sistemi "Nvidia" və "Horizon Robotics" çiplərindən güc alır. Avadanlıq səviyyəsindən asılı olaraq, 7/11 kamera quraşdırmasını (7 uzun məsafəli kamera və 4 genişbucaqlı park kamerası) və tək və ya çoxlu "LiDAR" sensorlarını dəstəkləyir.
Emil Nağızadə
19:35 18.01.2025
Oxunuş sayı: 8767
