TİKA-nın inkişaf elçiləri Marneulidəki Azərbaycan Evini və GAİM-i ziyarət ediblər
Türkiyə Əməkdaşlıq və Koordinasiya Agentliyinin (TİKA) Gürcüstanda səfərdə olan inkişaf elçilərindən ibarət nümayəndə heyəti Azərbaycan Respublikasının Diasporla İş üzrə Dövlət Komitəsinin layihələri çərçivəsində Marneulidə fəaliyyət göstərən Azərbaycan Evi və Gürcüstan Azərbaycanlılarının İnteqrasiya Mərkəzini (GAİM) ziyarət ediblər.
Crossmedia.az xəbər verir ki, qonaqlar əvvəlcə Azərbaycan Evində GAİM-in rəsm müəllimi Xəyalə Mustafayevanın Gürcüstan-Azərbaycan və Türkiyə dostluğuna həsr olunan əl işlərindən ibarət sərgi baxış keçiriblər.
Daha sonra Cəmilə Məmmədovanın bədii rəhbərliyi ilə GAİM-in nəzdindəki “Sarvan” folklor ansamblının üzvləri Azərbaycan və Gürcüstan milli rəqslərini təqdim ediblər. Milli musiqi və rəqslərin vəhdətində hazırlanan çıxış qonaqlar tərəfindən maraqla izlənilib.
Görüş daha sonra dəyirmi masa formatında davam etdirilib.
Azərbaycan Evinin və GAİM-in direktoru Məhəbbət İmanov qonaqları salamlayaraq bu qurumların fəaliyyəti, həyata keçirilən layihələr və gənclərin inkişafı üçün yaradılan imkanlar barədə məlumat verib.
TİKA-nın Gürcüstan nümayəndəliyinin rəhbəri Salih Özer görüşün əhəmiyyətindən söz açıb, Azərbaycan Evi və GAİM-in fəaliyyətini yüksək qiymətləndirib. Qonaqlar gənclərin inkişafına, fəal və yaradıcı mühitin formalaşdırılmasına, eləcə də milli-mədəni dəyərlərin qorunmasına yönəlmiş layihələrin vacibliyini vurğulayıblar.
Görüşün sonunda Məhəbbət İmanov Salih Özerə Heydər Əliyev Fondu tərəfindən hazırlanan, Ümummilli Lider Heydər Əliyevin həyat və fəaliyyətinə həsr olunan “Vətənə, xalqa həsr edilən ömür” adlı nadir albom nəşrini təqdim edib.
17:11 27.08.2026
Oxunuş sayı: 39
