Bu istək gənclərin ata-anaları ilə olan bağlarını zəiflədir
Gənclərin xaricdə yaşamaq istəyi son illərdə yalnız təhsil və karyera imkanları ilə deyil, daha yüksək gəlir, həyat səviyyəsi və şəxsi inkişaf perspektivləri ilə də əlaqələndirilir. 2023-cü ildə 17-35 yaş arası 1085 nəfər arasında aparılan araşdırmada iştirakçıların yarıdan çoxunun ölkədən daimi köçmək niyyətində olduğu müəyyənləşib; əsas motivlər arasında yüksək qazanc və daha yaxşı həyat standartları göstərilib. Digər tərəfdən, 2023-cü il Azərbaycan Gənclər Araşdırmasına görə, gənclərin yalnız 14%-i xaricdə təhsil almaq və ya işləmək istəyini mümkün və ya qəti niyyət kimi ifadə edib. Bu rəqəmlər göstərir ki, xaricdə yaşamaq arzusu bütün gənclərə şamil edilən vahid tendensiya deyil və onun arxasında müxtəlif sosial, iqtisadi və şəxsi səbəblər dayanır.
Sosioloq Mail Yaqub Crossmedia.az-a açıqlamasında bu tendensiyanın səbəblərindən və gənclərin ölkədə qalması üçün vacib olan amillərdən danışıb: “Sərhədlər müasir dövrdə açıqdır və sanki bütün dünya vahid bir məkana çevrilib. Kommunikasiya imkanları artıb. Gənclərin sosial şəbəkələr və internet vasitəsilə xarici ölkələrdən aldıqları informasiyalar da çoxalıb. Bu baxımdan, gənclərin müəyyən bir qismində xaricə köçmək, orada təhsil almaq və yaşamaq istəyi var. Lakin bəzi hallarda gənclərin xarici ölkələrlə bağlı təsəvvürləri reallığı tam əks etdirmir. Onlar orada həyatın daha asan olduğunu və qısa müddətdə yüksək gəlir əldə edə biləcəklərini düşünürlər. Halbuki işini bilməyən və nizam-intizamlı olmayan gəncin xaricdə uğur qazanması da çətin olacaq”.
Sosioloqun sözlərinə görə, daha yüksək təhsil və maddi rifah əldə etmək istəyi də gənclərin xaricə üz tutmasının əsas səbəbləri sırasındadır: “Gənclər təbii olaraq inkişaf etmək, yüksək təhsil almaq və daha yaxşı maddi imkanlara sahib olmaq istəyirlər. Müasir kapitalizm dövrü insanları daha çox maddiyyata yönəldir. İnsanlar daha yaxşı yaşamaq, çox pul qazanmaq və yüksək rifaha çatmaq istəyirlər. Bəzən bu istək gənclərin ata-anaları ilə olan bağlarını da zəiflədə bilər. Yüksək maddi rifaha çatmaq arzusu onları doğma ailələrindən uzaqlaşdıra və ailələrinə qarşı biganələşdirə bilər. Mühacirətin təhlükəli tərəflərindən biri də budur”.
M.Yaqub hesab edir ki, gənclərin ölkədə qalması üçün həm iqtisadi imkanların, həm də mənəvi bağlılığın gücləndirilməsi vacibdir:
“Azərbaycanda təhsil və iş imkanları o qədər yüksək olmalıdır ki, gənclərimiz yüksək gəlir və maddi rifah üçün xaricə üz tutmasınlar, öz biliklərini Azərbaycanda tətbiq etsinlər və ölkəyə töhfə versinlər. Digər tərəfdən, gənclərlə psixoloji və mənəvi istiqamətdə iş aparılmalıdır ki, onlar vətənə və ailələrinə bağlı olsunlar, valideynlərinə qayğı göstərməyi üstün tutsunlar”.
Nigar Xəlilli
18:30 27.08.2026
Oxunuş sayı: 48
