Telefonla danışa bilməyəcəksiniz - Səbəb bu partlayışdır
Günəşdə aktivlik kəskin artıb və cəmi bir neçə saat ərzində M səviyyəli 3 güclü partlayış qeydə alınıb. Partlayışların gücü M1.7–M1.9 arasında olub və bu, avqust ərzində qeydə alınan M səviyyəli hadisələrin sayını demək olar ki, iki dəfə artırıb. Alimlər Yerə doğru plazma atışının olub-olmayacağını hələ dəqiqləşdirirlər, lakin hazırkı vəziyyətdə Yer üçün risklərin son aylarda ən yüksək həddə çatdığı bildirilir. Və ümumiyyətlə Günəşdə baş verən partlayışlar çoxalmağa davam edir. Bəs bu yer kürəsinə necə təsir göstərə bilər?
Astroloq Sabira Cəfər Crossmedia.az-a açıqlamasında Günəş aktivliyinin hazırkı vəziyyətindən və qarşıdakı dövrdə baş verə biləcək proseslərdən danışıb: “Günəş hazırda 25-ci dövrdədir. Bu mərhələnin maksimum aktivliyi 2024-2025-ci illərdə müşahidə olunub və bundan sonrakı dövrdə Günəş azalan fazada aktivliyini davam etdirəcək. Ümumiyyətlə, bu aktivlik Günəşdə ləkələrin sayının artması, xüsusilə Günəş fırtınalarının baş verməsi ilə müşayiət olunur. Kosmosa atılan hissəciklər Yerin maqnit sahəsinə təsir göstərə bilir. Bu proseslər nəticəsində meteohəssas insanlarda yorğunluq, baş ağrısı və narahatlıq kimi hallar müşahidə oluna bilər”.
S.Cəfərin sözlərinə görə, Günəşdə aktiv proseslərin 2027-ci ilə qədər davam etməsi, daha sonra isə tədricən azalması gözlənilir: “Hazırkı dövrdə də bu proseslərin davam edəcəyi qənaətindəyəm. Günəşdə tac kütlə atılmaları hələ də baş verir və ləkələrin sayı kifayət qədər çoxdur. Günəş aktivliyinin 2027-ci ilə qədər davam edəcəyi, daha sonra isə tədricən azalacağı gözlənilir. 2026-cı il və 2027-ci ilin ilk yarısında güclü Günəş partlayışlarının baş verməsi mümkündür. Bunun 100 faiz baş verəcəyini söyləmək olmaz, lakin Günəş aktivliyinin pik mərhələsindən sonra da güclü hadisələr müşahidə oluna bilər”.
Ekspert tarixi nümunələri xatırladaraq, güclü Günəş fırtınalarının rabitə və elektrik sistemlərinə təsir göstərə bildiyini qeyd edib: “1859-cu ildə Karrinqton hadisəsi nəticəsində teleqraf xətlərinin fəaliyyətində ciddi problemlər yaranmışdı. 1921-ci ildə Nyu-Yorkda güclü elektromaqnit fırtınası müşahidə olunub və teleqraf, telefon xətlərində problemlər yaranıb. 1989-cu ildə Kanadada baş verən Kvebek fırtınası isə elektrik şəbəkəsinin fəaliyyətinə təsir göstərib. 2012-ci ildə də Günəşdə çox güclü partlayış baş verib. Güclü Günəş atılımı Yer istiqamətində hərəkət etsə də, birbaşa Yerə çatmayıb. Əgər həmin hissəciklər Yerə doğru gəlib çatsaydı, Karrinqton hadisəsinə bənzər ciddi nəticələr yarana bilərdi”.
Nigar Xəlilli
10:30 27.08.2026
Oxunuş sayı: 45
