Bir salamın da həddi var: Kişilərin öpüşərək görüşməsi gündəmdə
Azərbaycanda kişilərin görüşərkən öpüşərək salamlaşması uzun illərdir qohumluq, dostluq və səmimiyyət münasibətlərinin ifadəsi kimi qəbul edilir. Bu ənənə cəmiyyətdə geniş yayılsa da, sosial münasibətlərin dəyişməsi, pandemiya dövründə sosial məsafənin aktuallaşması və insanların ünsiyyət dairəsinin genişlənməsi bu vərdişə də təsir göstərib. Qazaxstanın Prezidenti Tokayev də çıxışında qeyd edib ki, kişilərin bir-biri ilə öpüşməsi yolverilməzdir!
"Əvvəla, bu öpüşmələrin 99,9 faizi qeyri - səmimidir! İkincisi, çox gülünc görünür! Üçüncüsü, xəstəlik mənbəyidir! Bu "mehribanlığı" unudun, getsin!"..Bəs gündəlik həyatda tez-tez təkrarlanan bu davranış hansı hallarda ənənə, hansı hallarda isə sadəcə vərdiş hesab oluna bilər?
Sosioloq Hüseyn İbrahimov Crossmedia.az-a açıqlamasında bildirib ki, elə cəmiyyətlər var ki, orada insanlar yalnız əl ilə görüşüb isti münasibətlərini bildirirlər. Elə cəmiyyətlər də var ki, kişilər bir-biri ilə öpüşərək görüşürlər. Digər cəmiyyətlərdə isə insanlar üzlərini bir-birinə toxundurmaqla öz ehtiramlarını, səmimiyyətlərini və yaxın dostluq əlaqələrini ifadə edirlər.
"Bizim cəmiyyətimizdə kişilərin bir-biri ilə öpüşərək görüşməsi ənənəsi qohumluq, dostluq və xoş münasibətlərdən qaynaqlanır. Bu cür hallara həmişə rast gəlinib və bu, mövcud olan bir ənənədir. Qeyd etmək lazımdır ki, bu münasibətlər həm qohumlar, həm də dostlar arasında hər zaman mövcud olub.
Hətta indi belə bir tendensiya yaranır ki, sosial medianın inkişafı və sosial şəbəkələrin insanlar arasında geniş əlaqələr qurması dostluq şəbəkəsinin çərçivəsini bir qədər də genişləndirir. Yəni əvvəllər insanların birbaşa ünsiyyətdə olduğu 20–30 nəfərlə dostluq əlaqəsi var idisə, indi bu göstərici 5–10 dəfə artıb. Belə olan halda, təbii ki, öpüşərək görüşənlərin də sayı və statistikası çoxalır.
Pandemiya dövründə sosial məsafənin qorunması baxımından bu ənənə demək olar ki, xeyli zəifləmişdi. Bir çox insanlar elə indi də pandemiyanın təsiri ilə bu kimi vərdişləri demək olar ki, tərgidiblər".
Sosioloq qeyd edib ki, kişilər arasında öpüşərək görüşmək ehtiram və səmimiyyət göstəricisidir: "Bu halın tamamilə aradan qaldırılmasını və ya mənfi bir hal kimi qiymətləndirilməsini vurğulamaq istəməzdim.
Bununla belə, insan bu vərdişi həddindən artıq genişləndirməməlidir. Yəni kişilər bir-biri ilə uzun müddət dostluq, yoldaşlıq və ya qohumluq əlaqələri saxlayıb, lakin uzun zaman görüşməyiblərsə, o zaman öpüşərək görüşmək tamamilə başadüşüləndir. Bu, zaman və məsafə amili ilə bağlı olan bir haldır.
Lakin hər gün eyni adamlar bir-birini görürlərsə və hər dəfə qarşılaşdıqda öpüşərək görüşürlərsə, bu kimi vərdişlər aradan qaldırılmalıdır. Yəni bunun hər gün təkrarlanan bir adətə çevrilməsi yaxşı hal deyil.
Bu, həm sağlamlıq, həm də adət-ənənələrimiz baxımından düzgün sayılmır. Çünki tez-tez görüşən insanların hər dəfə öpüşməsi nəinki kişilər, heç qadınlar arasında da arzuolunan deyil. Bu, daha çox xanımlara xas olan bir vərdişdir və bu halların azalması daha yaxşı olardı.
Yekun olaraq, uzun müddət bir-birini görməyən dostların, tanışların və ya həmkarların qarşılaşarkən öpüşərək görüşməsi tamamilə anlaşılandır”.
Zeynəb Həsən
15:00 26.08.2026
Oxunuş sayı: 48
