Qadın və kişi ətirlərində YENİ İSTİQAMƏT – hansı qoxular trenddədir?
Ətir dünyasında son dövrlər müşahidə olunan trendlərdə müəyyən dəyişikliklər baş verir. Bir müddət əvvəl qeyri-adi və futuristik qoxulara maraq artmışdı. Asfalt, avtomobil təkəri kimi fərqli qoxular üzərindən hazırlanan ətirlər diqqət çəkirdi. Eyni zamanda ekler, trileçe və pistaşo latte kimi həddindən artıq şirin və qurme qoxular da populyarlıq qazanmışdı. Lakin son dövrlərdə bu istiqamətdəki marağın nisbətən səngidiyi müşahidə olunur. Ətir markaları daha realistik və təbii qoxulara yönəlməyə başlayıb. Xüsusilə meyvə, yarpaq, ot və digər təbii notlar yeni ətir kolleksiyalarında daha çox istifadə olunur. Qadın və kişi ətirlərində isə bu tendensiya fərqli formalarda özünü göstərir.
Crossmedia.az-a açıqlamasında ətirçi Murad Məsud bildirib ki, ətir gündəmində və trendlərində son vaxtlar müşahidə olunan bum bir qədər səngiyib.
“İfrat futuristik qoxular - asfalt qoxusu, avtomobil təkəri - üzərində qurulan trendlər bir qədər səngiyib. İkincisi, hədsiz qurme notlar, qurme qoxular – ekler, trileçe, pistaşo latte və s. kimi nümunələri artırmaq olar – bu aşırı qurme, intensiv şirin qoxular da səngiyib. İlin əvvəlindən başlayaraq bir armud ab-havası var bütün ətirlərdə. Demək olar ki, bütün məşhur markalar armud akkordları üzərindən gedir. Bu armud akkordunun paralelində də, məsələn, fındıq, gavalı kimi notlardan istifadə olunur. Ətir maksimum şirin olacaqsa, vanillə tamamlanır. Yəni daha realistik ətirlərə yenidən sanki dönüş oldu”.
Ətirçi qeyd edib ki, bu ilin sonuna qədər belə davam edəcək: “Gələn ilin trendini bilmirəm, amma bu ilin əvvəlindən ilin sonuna qədər çox güman ki, markalar daha realistik istiqamətə yönəlib. Bizim də hazırladığımız son ətirlər əsasən qarpız, gavalı, fındıq, ot, yarpaq kimi notlar üzərində qurulub. Qadın ətirlərinə gəldikdə, qadın ətirləri əvvəlki kimi meyvəlidirsə belə, indi daha ciddi meyvəlidir. Daha tüstülü, daha dumanlı meyvə qoxuları ön plana çıxır. Məsələn, yenə də şaftalı trenddədir, bir çox markalarda çiyələk və albalı notlarından istifadə olunur, amma bunlar daha qaranlıq və daha dərindir. Daha intensiv qoxulardır. Bir qədər də sitrus notlarına yönəlmə var qadın ətirlərində. Kişi ətirlərində isə həmişəki kimi yenə ədviyyəli, istiotlu, içki akkordları, mineral akkordlar üstünlük təşkil edir. Kişi ətirlərində ümumi istiqamət demək olar ki, eynidir, sadəcə cüzi dəyişikliklər var. Məsələn, ananas hansısa ətirdə, tutaq ki, Creed Aventus-da məşhur olmuşdusa, mineral notlar da, tutaq ki, Dior Sauvage-da məşhur olmuşdusa, indi həmin akkordlar birləşdirilərək istifadə edilir. Yəni kişi ətirləri dəyişməz olaraq qalır, sadəcə cüzi toxunuşlarla".
Zeynəb Həsən
19:30 24.08.2026
Oxunuş sayı: 54
