Şadlıq saraylarının fırıldağı - köhnə yeməklər verilir
Son zamanlar toy və digər kütləvi məclislərdə qida zəhərlənməsi halları tez-tez gündəmə gəlir. Son olaraq İsmayıllının Hacıhətəmli kəndində həyətyanı sahədə keçirilən toy məclisindən sonra 31 nəfərə zəhərlənmə diaqnozu qoyulub. Toylarda və xüsusilə belə böyük məclislərdə qidalarda nəyə diqqət etmək lazımdır?
Mövzu ilə bağlı qida mütəxəssisi Seymur Qafarov Crossmedia.az-a açıqlamasında bildirib ki, xüsusilə bölgələrdə keçirilən və əvvəlcədən evdə hazırlanan qidaların şadlıq sarayına gətirildiyi “menyu toyları”nda qida təhlükəsizliyi baxımından bir sıra risklər mövcuddur: “El şənliklərində, xüsusilə bölgələrdə istifadə olunan toy mərasimlərindən biri də “menyu toyu” adlanır. Bu zaman şadlıq sarayı və onun inventarları, qab-qacaq kirayə götürülür, əvvəlcədən evdə hazırlanmış qidalar isə mərasimə gətirilir. Bu zaman şadlıq saraylarında əvvəlcədən hazırlanmış menyu və inqrediyentlər əsasında hazırlanan qidalardan fərqli olaraq, qida təhlükəsizliyi baxımından bir sıra riskli faktorlar meydana çıxır. Bunlardan biri həmin qidalar üçün müvafiq müşayiətedici sənədlərin olmamasıdır. Söhbət toyuq ətinin ekspertiza aktından, mal ətinin baytarlıq arayışından və digər qida məhsullarına dair sənədlərdən gedir. İkinci məsələ qida məhsullarının lazımi temperatur şəraitində şadlıq sarayına çatdırılmamasıdır. Xüsusilə soyuq qəlyanaltılar və salatlar uyğun temperaturda, yəni 0-5 dərəcə arasında saxlanılmadan hazırlanır və birbaşa şadlıq sarayına çatdırılır. Bəzən bu daşınma adi avtomobillərlə, xüsusi yuyula bilən material və soyuducu mühitlə təmin olunmayan nəqliyyat vasitələri ilə həyata keçirilir. Bu da qida təhlükəsizliyi baxımından ciddi risk faktorudur. Belə hallar qida zəhərlənməsinə, qusma, ishal və digər sağlamlıq problemlərinə səbəb ola bilər. Eyni zamanda, məhsulların hansı temperaturda, hansı nöqtədən çıxarılaraq hara çatdırılması barədə temperatur nəzarəti və qeydiyyatı da aparılmır. Bu isə qida təhlükəsizliyi ilə bağlı müəyyən tələblərin pozulmasına gətirib çıxara bilər”.
S.Qafarov qeyd edib ki, xüsusilə yay aylarında alkoqolsuz içkilərin saxlanma şəraiti də diqqətdə saxlanılmalıdır: “Alkoqolsuz içkilər günəş şüaları altında saxlanıla bilər. Yay mövsümündə bəzən bu məhsullar əvvəlcədən toy keçiriləcək saraylara gətirilir və orada soyuducuya yerləşdirilir. Lakin onların uzun müddət uyğun olmayan şəraitdə qalması da risk yarada bilər. Eyni zamanda, qida məhsullarının dezinfeksiya olunmuş və gigiyenik şəraitdə hazırlanması vacibdir. Şadlıq sarayında deyil, ev və məişət şəraitində hazırlanan qidalar uyğun gigiyenik tələblərə cavab vermədikdə əlavə risklər meydana çıxır. Ona görə də belə toyların bu formada keçirilməsindənsə, qidaların şadlıq saraylarının peşəkar mətbəxlərində hazırlanması daha məqsədəuyğundur. Həmin məhsulların təminatı zamanı da müvafiq müşayiətedici sənədlərin, o cümlədən toyuq ətinin ekspertiza aktı və mal ətinin baytarlıq arayışının olmasına diqqət edilməlidir. Məhsullar müəssisədə hazırlanarkən işçilər gigiyenik təlimlərə və dövri tibbi müayinələrə cəlb olunmalıdırlar. Bu tələblərə əməl edildikdə qida təhlükəsizliyi baxımından yarana biləcək riskləri əhəmiyyətli dərəcədə azaltmaq mümkündür. Əks halda çarpaz, fiziki, mikrobioloji və kimyəvi çirklənmə halları baş verə bilər”.
Zərnigar Hüseynli
17:00 24.08.2026
Oxunuş sayı: 50
