Gürcüstanda nə baş verir, müxalifət sabitliyi təhdid edir? - AÇIQLAMA

Gürcüstanda son günlər baş verən etiraz aksiyaları ölkədə sabitliyə və təhlükəsizliyə ciddi təhdid yaradır. Tbilisidə baş verən aksiyalar, xüsusilə də xarici dairələrin təsiri altında yönləndirilən müxalifət nümayəndələrinin təxribatları, Gürcüstanın milli maraqlarına zərər vurur. Avropa İttifaqına inteqrasiya siyasətinə dair bəzi mübahisəli iddiaların aksiyalarda manipulyasiya vasitəsinə çevrilməsi ölkədəki demokratik proseslərin zədələnməsinə səbəb olur.

Xarici yardımların dondurulması və seçkilərlə bağlı ittihamlar kimi məsələlər ətrafında gərginlik yaradılması hökumətin həyata keçirdiyi islahatlara kölgə salmağa xidmət edir. Bununla belə, Gürcüstan hökuməti vəziyyətin sabitləşdirilməsi və cəmiyyətdə qarşıdurmaların aradan qaldırılması istiqamətində mühüm addımlar atır. Dövlət orqanları ölkənin konstitusiyasına uyğun olaraq idarəetmə proseslərini davam etdirir və vətəndaşların rifahını təmin etmək üçün səylərini gücləndirir.

Etirazçıların bəzi radikal tələbləri isə həm Gürcüstanın daxili sabitliyinə, həm də qonşu ölkələrlə mehriban münasibətlərinə təhlükə yaradır. Gürcüstan cəmiyyəti və hökuməti indiyə qədərki təcrübəsi ilə göstərib ki, milli maraqlarını müdafiə etməkdə və daxili məsələlərini müstəqil şəkildə həll etməkdə qətiyyətlidir. Dövlətin demokratik inkişaf yolunda irəliləməsi isə daxili sabitlikdən və müxtəlif siyasi qüvvələrin əməkdaşlığından asılıdır.

Məsələ ilə bağlı Crossmedia.az-a danışan Milli Məclisin deputatı Aydın Mirzəzadə Gürcüstanın Azərbaycanla dost, qardaş və mehriban münasibətləri olan qonşu bir ölkə olduğunu vurğulayıb. Deputat bildirib ki, “orada baş verən hadisələr, təbii ki, Azərbaycan üçün hər zaman maraqlı olub. Bir tərəfdən Azərbaycan, Gürcüstanın daxili məsələlərinin Gürcüstan xalqı tərəfindən həll olunacağına inanır və bunun əlamətlərini görürük. Digər tərəfdən isə Gürcüstandakı hər hansı bir narahatlıq Azərbaycanda da müəyyən narahatlıq yaradır. Biz qonşu ölkədə sabitliyin qorunmasında və cəmiyyətdəki qarşıdurmaların aradan qaldırılmasında maraqlıyıq”.

Deputat əlavə edib ki, “görünən odur ki, seçkilərdən sonra müxalifət təzyiq göstərərək yenidən seçkilərin keçirilməsinə və vəziyyəti öz xeyrinə dəyişməyə çalışır. Hazırda Gürcüstanın daxili məsələlərinə xaricdən müəyyən dairələrin də təzyiqləri müşahidə olunur. Lakin buna baxmayaraq, vəziyyətin tədricən nizama düşməsi istiqamətində addımlar atıldığını görürük. Sakit şəkildə Gürcüstan Konstitusiyasına uyğun olaraq ölkənin yeni dövlət başçısı seçilib. Bir neçə gündən sonra onun andiçmə mərasimi olacaq və Gürcüstan seçkidən sonrakı dövrdə artıq qarşısında duran məsələlərin həlli ilə məşğul olacaq”.

O həmçinin vurğulayıb ki, “bu problemlərin hansı yolla həll ediləcəyini və hansı addımların atılacağını Gürcüstan hakimiyyəti və cəmiyyəti daha yaxşı bilir. Heç kimin onların yerinə qərar verməyə və ya onların adından danışmağa ixtiyarı yoxdur. Heç kim Gürcüstana onun milli maraqlarına zidd olan qərarları qəbul etdirməyə məcbur edə bilməz. İnanıram ki, Gürcüstan cəmiyyəti hər zaman olduğu kimi, qısa müddət ərzində yenidən daxili sabitliyə, əməkdaşlığa və müxtəlif siyasi qüvvələrin Gürcüstanın gələcəyi naminə birləşməsinə nail olacaq”.

Tbilisidə davam edən etirazlar Gürcüstanın gələcəyi ilə bağlı narahatlıqları daha da artırır.

Nihat Tahirov