"Yay Fest 2026"nın iştirakçıları müasir şəhərlər və texnologiyalar barədə məlumatlandırılıb
Gənclər Fondunun dəstəyi ilə həyata keçirilən "Yay Fest 2026"nın "Müasir Şəhərlər və Texnologiya" düşərgəsi başa çatıb.
Fonddan Crossmedia.az-a verilən məlumata görə, Şamaxı rayonunda təşkil olunan və festivalın sayca dördüncü düşərgəsinin əsas məqsədi gənclərin müasir şəhərsalma, memarlıq, rəqəmsal transformasiya, süni intellekt, innovasiya və dayanıqlı inkişaf istiqamətlərində bilik və bacarıqlarının inkişaf etdirilməsi, yaradıcı düşüncə tərzinin formalaşdırılması, liderlik və komanda ruhunun gücləndirilməsi olub.
Düşərgə çərçivəsində müvafiq dövlət qurumlarının və özəl sektorun nümayəndələrinin iştirakı ilə gənclər üçün "Şəhərsalmada yeni baxış: Təcrübə, innovasiya və inklüzivlik", "Qayıdışdan gələcəyə: Təhlükəsizlik və davamlı inkişaf", "AI for Digital City" və "Ağıllı robotlar, ağıllı gələcək" mövzularında görüşlər keçirilib.
"Yay Fest" iştirakçıları Qarabağ və Şərqi Zəngəzurda aparılan bərpa və yenidənqurma işləri, müasir şəhərsalma təcrübəsi, mina təhlükəsi, təhlükəsiz qayıdışın təmin olunması, süni intellektin gələcəyin şəhərlərinin planlaşdırılması və idarə olunmasındakı rolu, ağıllı şəhər həlləri, robot texnologiyaları və gələcəyin peşələri barədə məlumat əldə ediblər.
Eyni zamanda, IDEA İctimai Birliyinin təqdimatında iştirakçılar üçün "Urbanizasiya dövründə ekoloji çağırışlar və innovativ həllər" mövzusunda interaktiv sessiya təşkil olunub. Düşərgə müddətində siyasi və dövlət xadimi, diplomat, alim və tarix elmləri doktoru Həsən Həsənovun Azərbaycanın tarixi və dövlətçilik ənənələri mövzusunda gənclərlə görüşü də baş tutub.
Maarifləndirici proqramla yanaşı, gənclərin həm əyləncəli, həm də öyrədici zaman keçirməsi üçün "Sənin ideyan: Gələcəyin şəhəri!" ideyatonu, "KOD Qarabağ" intellektual oyunu, "DİRÇƏLİŞ" Urban Art vörkşopu, airsoft taktiki oyunu, Rəsədxana muzeyinə ekskursiya, idman yarışları və komanda quruculuğu fəaliyyətləri təşkil olunub. "Yay Fest" axşamları gənclərin sevimli mahnılarının ritmində rəqslər və tonqal ətrafında edilən səmimi söhbətlərlə yadda qalıb.
Beş gün davam edən "Müasir Şəhərlər və Texnologiya" düşərgəsi gənclərin müasir çağırışlara uyğun olaraq bilik və bacarıqlarının inkişaf etdirilməsi, gələcəyin şəhərlərinə dair innovativ baxışlarının formalaşdırılması və gənclərin bir-biri ilə şəbəkələşməsi baxımından uğurla başa çatıb.
12:02 08.08.2026
Oxunuş sayı: 70
