Azərbaycan birmənalı şəkildə Ukraynanı dəstəkləyir - Rəy
Azərbaycan və Ukrayna arasında münasibətlər son illərdə qarşılıqlı siyasi dialoq, humanitar əməkdaşlıq və beynəlxalq hüququn prinsiplərinə söykənən mövqe ilə diqqət çəkir. Rusiya-Ukrayna müharibəsinin davam etdiyi bir dövrdə rəsmi Bakının Ukraynanın ərazi bütövlüyünə verdiyi dəstək, humanitar yardımlar və iki ölkə arasında yüksək səviyyəli təmaslar münasibətlərin inkişafında mühüm rol oynayır. Ukrayna Prezidenti Volodimir Zelenskinin Azərbaycana göstərilən dəstəyə və konstruktiv dialoqa görə təşəkkür etməsi də bu münasibətlərin növbəti mühüm göstəricisi kimi qiymətləndirilir. Mütəxəssislər hesab edirlər ki, iki ölkə arasında formalaşmış qarşılıqlı etimad bundan sonra da əməkdaşlığın genişlənməsinə zəmin yaradacaq.
Mövzu ilə bağlı Crossmedia.az-a açıqlama verən Milli Məclisin deputatı Aydın Mirzəzadə bildirib ki, Azərbaycan və Ukrayna xalqları arasında münasibətlər tarixən həmişə yaxşı olub. "Müstəqillik qazandıqdan sonra isə bu münasibətlər daha da güclənib. Tərəflər bir-birinin müstəqilliyinə və suverenliyinə hər zaman hörmətlə yanaşıblar. Hər iki ölkədə qarşılıqlı diaspora icmaları fəaliyyət göstərir, onlar həm öz milli dəyərlərini, tarixini və mədəniyyətini qoruyur, həm də yaşadıqları ölkənin layiqli vətəndaşı olmağa çalışırlar.
Azərbaycan Rusiya-Ukrayna münaqişəsindən sonra birmənalı şəkildə Ukraynanın ərazi bütövlüyünü dəstəklədi. Ukraynaya hər zaman humanitar yardım göstərib və bundan sonra da göstərəcək. Ukrayna Prezidentinin Azərbaycana səfəri təkcə iki dövlət arasında deyil, dünya səviyyəsində də diqqəti cəlb edən hadisə oldu. Tərəflər münasibətləri bundan sonra da möhkəmləndirmək barədə razılığa gəldilər.
Azərbaycanın xarici işlər nazirinin Ukraynaya son səfəri də onu göstərdi ki, Ukrayna Azərbaycanla dostluğu yüksək qiymətləndirir. Ukrayna Prezidenti xarici siyasət idarəmizin rəhbərini qəbul edərkən Azərbaycana göstərilən dəstəyə və qardaşlığa görə təşəkkürünü bildirdi. Bundan sonra da münasibətlərimiz ən yüksək səviyyədə olacaq”.
Deputat qeyd edib ki, Cənab Prezidentimiz hər zaman Ukrayna ilə bağlı yüksək fikirlərini ifadə edir, Ukraynanın ərazi bütövlüyünü dəstəkləyir: “Əlaqələrimiz həm rəsmi səviyyədə, həm də xalqlar arasında yüksələn xətlə inkişaf edəcək və daha da möhkəmlənəcək".
Zeynəb Həsən
18:00 07.08.2026
Oxunuş sayı: 46
