Qalmaqallı “hekayənin” sonu: FİFA prezidentinin dəyişilməsi gözlənilir
Dünya futbolunun idarəçiliyi ilə bağlı fikir ayrılıqları yeni mərhələyə qədəm qoyub. FIFA ilə UEFA arasında yaranan gərginliyin təşkilatların gələcək əməkdaşlığına və beynəlxalq turnirlərin formatına təsir göstərə biləcəyi müzakirə olunur. Xüsusilə FIFA prezidentliyi ətrafında yaşanan fikir ayrılıqları alternativ yarış modelinin gündəmə gəlməsinə səbəb olub. Bu fonda UEFA-nın tərəfdaş konfederasiyalarla birlikdə Dünya Kubokunun alternativ versiyasını keçirmək ehtimalı beynəlxalq futbol ictimaiyyətinin diqqət mərkəzindədir.
Əməkdar jurnalist, Qol.az saytının baş redaktoru Aydın Bağırov Crossmedia.az-a açıqlamasında bildirib ki, UEFA-nın FIFA-ya alternativ Dünya Kuboku keçirməsi ilə bağlı iddialar real görünmür və hazırda belə bir plan gündəmdə deyil.
Ekspertin sözlərinə görə, əsas mübahisə FIFA-nın kommersiyalaşma təşəbbüsləri ilə bağlı olub:
"Məsələ alternativ Dünya Kuboku deyil. FIFA milli assosiasiyaları yarışlara yeni investorların cəlb olunmasına təşviq edirdi. Bu isə gələcəkdə turnirlərin idarəçiliyində investorların təsir imkanlarını artıracaqdı".
A.Bağırov qeyd edib ki, bu yanaşma futbol ictimaiyyətində ciddi narazılıq yaradıb:
"Əgər Dünya Kuboku investorların təsir dairəsinə düşsəydi, bundan ən çox zərər görən tərəf milli assosiasiyalar, klublar, futbolçular və məşqçilər olacaqdı. FIFA gəlir əldə edəcəkdi, lakin futbolun digər iştirakçıları bundan ziyan çəkəcəkdi".
O, bildirib ki, məhz bu səbəbdən UEFA və digər konfederasiyalar məsələ ilə bağlı vahid mövqe nümayiş etdiriblər:
"UEFA, Cənubi Amerika Futbol Konfederasiyası (CONMEBOL) və Şimali, Mərkəzi Amerika və Karib Hövzəsi Futbol Konfederasiyası (CONCACAF) həmrəylik göstərərək bildirdilər ki, Dünya Kuboku investorların nəzarətinə keçərsə, 2030-cu il turnirini boykot edə bilərlər".
A.Bağırovun fikrincə, həmin təzyiqlərdən sonra FIFA planından geri çəkilməyə məcbur olub:
"Bundan sonra FIFA bu təşəbbüsdən imtina etdi. Hazırda belə bir plan qüvvədə deyil. Hazırda əsas problem FIFA prezidenti Canni İnfantinonun fəaliyyətinə yönələn narazılıqlardır. Bu gün futbol ictimaiyyətində Canni İnfantinoya qarşı ciddi narazılıq var. Hesab olunur ki, o, FIFA-nı futbol qurumundan daha çox biznes mərkəzinə çevirmək istəyir və dünya futbol ictimaiyyəti buna imkan vermir".
Müsahibimiz əlavə edib ki, bu narazılıqlar gələcək prezident seçkilərinə də təsir göstərə bilər: "Hesab edirəm ki, 2027-ci ildə keçiriləcək prezident seçkilərində Canni İnfantinonun yenidən FIFA prezidenti seçilmək şansı əvvəlki dövrlərlə müqayisədə xeyli aşağı olacaq".
Nigar Xəlilli
15:30 05.08.2026
Oxunuş sayı: 53
