Fransaya “soyuq duş”: Bakı Təşəbbüs Qrupunun fəaliyyəti nəticə verir
Fransanın dənizaşırı ərazilərində müstəmləkəçilik siyasəti ilə bağlı müzakirələr son vaxtlar yenidən beynəlxalq diqqət mərkəzinə çıxıb. Xüsusilə Qvadelupadan səslənən son çağırışlar bu məsələnin təkcə Fransanın daxili siyasəti ilə məhdudlaşmadığını, beynəlxalq hüquq, insan hüquqları və dekolonizasiya kontekstində də aktuallığını qoruduğunu göstərir. Bu fonda mövzunun regional və beynəlxalq müstəvidə doğura biləcəyi nəticələr maraq doğurur.
Politoloq Zeynal Əmrəliyev Crossmedia.az-a açıqlamasında bildirib ki, Qvadelupa rəsmilərinin Fransa hakimiyyətinə və BMT-yə ünvanladıqları çağırışlar dekolonizasiya məsələsinin beynəlxalq gündəmdə yenidən aktuallaşdığını göstərir:
"Bu bəyanatlar Parisin dənizaşırı ərazilərdə həyata keçirdiyi siyasətin yerli əhalinin hüquqları, sosial-iqtisadi tələbləri və öz müqəddəratını təyinetmə prinsipi ilə ciddi ziddiyyət təşkil etdiyini bir daha ortaya qoyur".
Ekspert qeyd edib ki, bu çağırışların beynəlxalq təşkilatların tribunalarından səsləndirilməsi Fransanın beynəlxalq imicinə mənfi təsir göstərir:
"Belə bəyanatlar Fransanın qlobal miqyasda insan hüquqlarının müdafiəçisi kimi formalaşdırdığı imicə ciddi zərbə vurur. Eyni zamanda, Parisin daxili bəyanatları ilə xarici siyasətdəki praktiki addımları arasındakı ikili standartları üzə çıxarır və onun beynəlxalq diplomatik mövqelərini zəiflədir".
Z.Əmrəliyev vurğulayıb ki, baş verən proseslər Bakı Təşəbbüs Qrupunun fəaliyyətinin aktuallığını və əhəmiyyətini bir daha təsdiqləyir:
"Bu hadisələr Bakı Təşəbbüs Qrupunun fəaliyyətinin nə qədər vaxtında və zəruri olduğunu əyani şəkildə nümayiş etdirir. Təşkilat qlobal dekolonizasiya hərəkatının mühüm platformalarından birinə çevrilərək haqsızlığa məruz qalan xalqların səsinin dünya ictimaiyyətinə çatdırılmasına mühüm töhfə verir".
Politoloq əlavə edib ki, Qvadelupa kimi regionlardan gələn çağırışlar Bakı Təşəbbüs Qrupunun beynəlxalq hüquq çərçivəsində apardığı fəaliyyətin daha da güclənməsinə şərait yaradır:
"Qvadelupa kimi regionlardan yüksələn səslər Bakı Təşəbbüs Qrupunun beynəlxalq hüquq müstəvisində gördüyü işlərin dərinləşməsinə, Azərbaycanın Qlobal Cənub ölkələri ilə həmrəylik siyasətinin möhkəmlənməsinə və müstəmləkəçilik qalıqlarına qarşı mübarizənin qlobal səviyyədə daha sistemli xarakter almasına güclü təkan verir".
Nigar Xəlilli
17:00 29.07.2026
Oxunuş sayı: 40
