Müharibənin ən gərgin nöqtəsi açıqlandı: Ukrayna döyüş taktikasını dəyişə bilər
Ukraynanın Donetsk vilayətinin Konstantinovka istiqamətində döyüşlərin şiddətlənməsi cəbhədə taktiki vəziyyətin dəyişdiyini göstərir. Logistika marşrutlarının məhdudlaşması və pilotsuz uçuş aparatlarının effektivliyinin azalması isə müasir müharibədə texnologiya və təminatın həlledici rolunu bir daha ön plana çıxarır.
Hərbi ekspert Anar Şuşalı Crossmedia.az-a açıqlamasında bildirib ki, Donetsk vilayətinin Konstantinovka istiqamətində döyüşlərin intensivləşməsi cəbhədə taktiki vəziyyətin dəyişdiyini göstərir:
"Hərbi müşahidələr göstərir ki, logistika marşrutlarının çətinləşməsi və radioelektron mübarizə vasitələrinin geniş tətbiqi müasir müharibənin gedişinə təsir edən əsas amillərdən birinə çevrilib. Bu istiqamətdə gedən döyüşlər də bunu bir daha təsdiqləyir".
Ekspert qeyd edib ki, Konstantinovka istiqaməti hazırda Ukrayna cəbhəsinin ən gərgin nöqtələrindən biridir:
"Bu ərazidə davam edən qarşıdurmalar göstərir ki, müasir döyüş meydanında üstünlüyü yalnız canlı qüvvə və ağır texnika deyil, eyni zamanda logistika imkanları və texnoloji üstünlük də müəyyənləşdirir".
A.Şuşalı vurğulayıb ki, təchizat zəncirində yaranan çətinliklər döyüş əməliyyatlarının gedişinə birbaşa təsir göstərir:
"Ön xəttə sursatın, yanacağın və ehtiyat qüvvələrin çatdırılmasında yaranan problemlər həm hücum, həm də müdafiə əməliyyatlarının tempini zəiflədə bilər. Buna görə tərəflər alternativ logistika marşrutları yaratmağa və təminat mexanizmlərini daha çevik qurmağa çalışırlar".
Ekspert bildirib ki, pilotsuz uçuş aparatları ilə radioelektron mübarizə sistemləri arasında texnoloji rəqabət müasir müharibənin əsas xüsusiyyətlərindən birinə çevrilib:
"FPV tipli pilotsuz uçuş aparatları hədəflərin aşkarlanması və zərbə endirilməsi baxımından mühüm rol oynayır. Lakin radioelektron mübarizə vasitələrinin inkişafı onların effektivliyini azaldır. Bu isə tərəfləri daim yeni texnoloji həllər və taktiki yanaşmalar hazırlamağa vadar edir".
Müsahibimiz əlavə edib ki, yaxın perspektivdə döyüş taktikasında daha çevik və texnologiyaya əsaslanan yanaşmalar üstünlük təşkil edəcək:
"Kiçik və yüksək mobilliyə malik bölmələrin rolu daha da artacaq. Təminat marşrutlarının şaxələndirilməsi və maskalanması gücləndiriləcək, kəşfiyyat imkanları genişləndiriləcək və radioelektron mübarizə sistemlərinin tətbiqi əməliyyat planlaşdırılmasının ayrılmaz hissəsinə çevriləcək. Konstantinovka istiqamətində baş verən hadisələr göstərir ki, müasir müharibələrdə uğur yalnız hərbi qüvvələrin sayı ilə deyil, logistika, texnologiya və informasiya üstünlüyünün düzgün əlaqələndirilməsi ilə müəyyən olunur".
Nigar Xəlilli
16:30 29.07.2026
Oxunuş sayı: 46
