Yeni Suriya: YPG-nin gələcəyi üçün mübarizə başlayır
Suriyada idarəetmənin dəyişməsindən sonra başlayan və qeyri-müəyyənliklərlə dolu yeni dövrün əsas məsələlərindən biri terrorçu təşkilat olan Xalq Müdafiə Birləşmələri adlanan YPG ilə bağlıdır. Bütün silahlı qrupların silahlarını buraxacaqlarını açıqlaması, YPG üzərində təzyiqləri artırıb.
Crossmedia.az “BBC News”-a istinadən bildirir ki, Ankara, Dəməşq və Vaşinqton arasında YPG ilə bağlı keçirilən ilk danışıqların hələlik konkret nəticə vermədiyi və tərəflərin sahədəki mövqelərini qoruduğu bildirilir. Ankara və Dəməşqdəki yeni hakimiyyət YPG də daxil olmaqla bütün silahlı qrupların ləğv olunması ilə bağlı ortaq mövqe nümayiş etdirir. Eyni zamanda, ABŞ son günlərdə bölgədəki hərbi qüvvələrinin sayını artırıb və İŞİD hədəflərinə hücumları intensivləşdirib.
Yeni Suriya quruculuğu prosesində konstitusiya və siyasi sistem qədər maraq doğuran digər vacib məsələ, əsas tərkibini YPG-nin təşkil etdiyi Suriya Demokratik Qüvvələrinin (SDQ) taleyidir.
Bu qrupun Fərat çayının şərqində mühüm əraziləri nəzarətdə saxlaması və başda ABŞ olmaqla, əhəmiyyətli Qərb gücləri ilə əməkdaşlıq etməsi YPG məsələsini daha da mürəkkəbləşdirən amillərdir. YPG-nin İŞİD-lə mübarizəni davam etdirməsi, həmçinin İŞİD üzvlərinin saxlanıldığı həbsxanalar və onların ailələrinin yerləşdiyi düşərgələrə nəzarət etməsi problemin həllini çətinləşdirən digər faktorlardır.
Türkiyə YPG-ni PKK-nın Suriya qolu hesab edir və onu “terrorçu qruplar” siyahısında saxlayır. Dəməşq, Ankara və aparıcı Qərb paytaxtlarından verilən açıqlamalar göstərir ki, bu məsələ bütün tərəflər üçün prioritet olaraq qalır.
Fidan Hacızadə
13:46 25.12.2024
Oxunuş sayı: 3889
