Əməkdar jurnalist Nuraninin vəziyyəti açıqlanıb
Əməkdar jurnalist Tofiqə Qasımovanın (Nurani) səhhəti ilə bağlı son vəziyyət açıqlanıb.
Crossmedia.az xəbər verir ki, bu barədə Bakı Sağlamlıq Mərkəzi məlumat yayıb.Bildirilib ki, 56 yaşlı Tofiqə Qasımova iyulun 17-də Kliniki Tibbi Mərkəzin Reanimasiya şöbəsindən ağır vəziyyətdə Bakı Sağlamlıq Mərkəzinə köçürülüb.
Mərkəzə qəbul olunarkən xəstənin huşunun alaqaranlıq olduğu, ümumi bədən çəkisinin kəskin azaldığı (kaxeksiya), dəri örtüyü və görünən selikli qişalarının kəskin saraldığı müəyyən edilib. Tənəffüsü oksigen dəstəyi ilə təmin olunub. Hemodinamikasının inotrop dərmanlar fonunda qeyri-stabil və hipotonik olduğu, qarın boşluğunda assit səbəbindən həcmin kəskin artdığı, sidik ifrazının isə anuriya şəklində qiymətləndirildiyi bildirilib.
Qeyd olunub ki, anamnezə əsasən, xəstə bir neçə ildir onkoloji xəstəlikdən əziyyət çəkir.
Həkimlərin qoyduğu diaqnoz uşaqlığın yenitörəməsi, qaraciyərə və qarın boşluğu limfa düyünlərinə çoxsaylı metastazlar, mexaniki sarılıq, assit, qaraciyər mənşəli ensefalopatiya, qaraciyər çatışmazlığı, hepatorenal sindrom, kəskin böyrək çatışmazlığı, anuriya, sağtərəfli ekssudativ plevrit, tənəffüs çatışmazlığı və anemiyadır.
Məlumata görə, xəstə Bakı Sağlamlıq Mərkəzinə qəbul olunduğu andan etibarən müalicəsinə yüksək ixtisaslı mütəxəssislərdən ibarət həkim heyəti cəlb edilib. Təcili təşkil olunan geniş konsiliumun qərarı ilə ona hemodializ də daxil olmaqla intensiv reanimasion dəstək göstərilməsinə başlanılıb.
Hazırda Bakı Sağlamlıq Mərkəzinin həkimləri tərəfindən xəstənin həyati göstəricilərinin stabilləşdirilməsi istiqamətində bütün zəruri müalicə tədbirləri fasiləsiz davam etdirilir.
23:23 18.07.2026
Oxunuş sayı: 82
