İlk addımı Britaniya atdı: Digər Avropa ölkələri də SEPAH-I terror təşkilatı kimi tanıyacaq
Böyük Britaniya İran İslam İnqilabı Keşikçiləri Korpusunu (SEPAH) terror təşkilatları siyahısına daxil edib.
Britaniya hökumətinin qərarına əsasən, SEPAH-a üzv olmaq, onun tədbirlərində iştirak etmək və ya rəmzlərini ictimai yerlərdə nümayiş etdirmək cinayət əməli hesab ediləcək.
Qeyd edək ki, SEPAH daha əvvəl də Böyük Britaniyanın sanksiyalarına məruz qalıb. SEPAH 1979-cu il İran İslam İnqilabından sonra yaradılıb və həmin vaxtdan etibarən İran İslam Respublikasının Ali Rəhbərinə tabe olan elit hərbi qurum kimi fəaliyyət göstərir.
Siyasi şərhçi Elçin Alıoğlu Crossmedia.az-a açıqlamasında bildirib ki, Böyük SEPAH-ı terror təşkilatı kimi tanıması gözlənilməz addım deyil:
"SEPAH faktiki olaraq İran İslam Respublikasında dövlət daxilində dövlət funksiyasını yerinə yetirən bir qurumdur. Qeyri-rəsmi hesablamalara görə, İran iqtisadiyyatının 40 faizdən çoxu SEPAH-ın nəzarətindədir. Bank sektorunun təxminən 60 faizi, kapital tikintisi və infrastruktur layihələrinin isə 73 faizi birbaşa və ya dolayısı ilə bu qurumla əlaqəli strukturlar tərəfindən idarə olunur."
Politoloqun sözlərinə görə, SEPAH-ın fəaliyyəti təkcə İran daxilində deyil, region ölkələrində də ciddi təsirə malikdir:
"Bu qurumun nəzarət etdiyi istiqamətlərdən biri də narkotik vasitələrin region üzrə daşınma marşrutlarıdır. Eyni zamanda müxtəlif silahlı qrupların raket texnologiyaları, silah, rabitə vasitələri və digər hərbi resurslarla təmin edilməsində əsas rol oynayır. İranın 'müqavimət oxu' adlandırdığı, Suriyadan Yəmənədək uzanan şəbəkənin maliyyələşdirilməsi, təlimi və texniki təminatı da əsasən SEPAH həyata keçirir”.
E.Alıoğlu qeyd edib ki, Böyük Britaniyanın sözügedən qərarına səbəb olan amillərdən biri də SEPAH-ın Britaniya ərazisində fəaliyyət göstərmək cəhdləri olub:
"Britaniyanın Xarici İşlər Nazirliyinin belə bir qərar verməsi təsadüfi deyil. Çünki SEPAH Böyük Britaniya ərazisində də müxtəlif əməliyyatlar həyata keçirməyə cəhd göstərib. İndiyədək Britaniya hökuməti SEPAH-la bağlı bir neçə məhdudlaşdırıcı və xəbərdarlıq xarakterli qərar qəbul etmişdi. Bu məsələ həm Lordlar Palatasında, həm də İcmalar Palatasında dəfələrlə müzakirə olunub. Lakin həmin dövrdə Britaniyanın Yaxın Şərqdəki maraqları nəzərə alınaraq daha sərt addımlar atılmırdı."
Ekspert hesab edir ki, hazırkı geosiyasi vəziyyət Londonda yanaşmanın dəyişməsinə səbəb olub:
"SEPAH-ın Hörmüz boğazında yaratdığı gərginlik və Fars körfəzi ölkələrinə qarşı fəaliyyəti Britaniyanın mövqeyinin sərtləşməsinə gətirib çıxarıb. Buna görə də Böyük Britaniyadan sonra Avropanın digər ölkələrinin də SEPAH-ı qadağan olunmuş və ya terror təşkilatı kimi tanıması ehtimalı kifayət qədər yüksəkdir."
Nigar Xəlilli
10:00 15.07.2026
Oxunuş sayı: 55
