Le Pen Makrona qarşı hərəkətə keçdi: Fransada siyasi qütbləşmə güclənir
Fransada ifrat sağçı siyasətçi Marin Le Penlə bağlı məhkəmə qərarı ölkənin siyasi gündəmində yeni müzakirələrə səbəb olub. Apellyasiya Məhkəməsinin hökmü nəticəsində Le Pen haqqında həbs cəzası qüvvədə saxlanılsa da, onun seçkilərdə iştirakına qoyulan məhdudiyyət yumşaldılıb. Bu qərarın 2027-ci il prezident seçkiləri və Fransanın siyasi balansına mümkün təsirləri diqqət mərkəzindədir.
Politoloq Rəşad Bayramov Crossmedia.az-a açıqlamasında bildirib ki, Marin Le Penlə bağlı məhkəmə qərarı Fransanın daxili siyasi prosesləri baxımından mühüm əhəmiyyət daşıyır:
"Burada söhbət təkcə bir siyasətçinin hüquqi vəziyyətindən getmir. Qərar 2027-ci il prezident seçkiləri ərəfəsində ölkənin siyasi balansına təsir göstərə biləcək amillərdən biridir. Məlumdur ki, Marin Le Pen son illərdə Fransada ifrat sağ siyasi düşərgənin əsas simasına çevrilib. Onun seçkilərdə iştirak edib-etməməsi Milli Birlik Partiyasının gələcək strategiyası üçün də xüsusi əhəmiyyət daşıyır."
Politoloqun sözlərinə görə, hüquqi baxımdan məhkəmənin qərarı konkret hüquqi prosesin nəticəsi kimi qiymətləndirilməlidir:
"Dövlət vəzifələrindən məhrumetmə, seçkilərdə iştirakla bağlı məhdudiyyətlər və digər sanksiyalar məhkəmənin müəyyən etdiyi hüquqi çərçivə daxilində dəyərləndirilir. Ancaq Le Pen kimi yüksək reytinqə malik siyasətçi ilə bağlı belə qərarların siyasi nəticələr doğurmaması mümkün deyil”.
R.Bayramov qeyd edib ki, Avropada ifrat sağ partiyaların gücləndiyi bir dövrdə bu qərar müxtəlif siyasi interpretasiyalara səbəb ola bilər:
"Le Pen və tərəfdarları məhkəmə prosesini siyasi təzyiq kimi təqdim etməyə çalışa bilərlər. Bu isə seçicilərin bir hissəsində onun mövcud siyasi sistemə qarşı mübarizə aparan lider obrazını daha da gücləndirə bilər. Beləliklə, hüquqi proses eyni zamanda siyasi təsir vasitəsinə çevrilə bilər."
Ekspert hesab edir ki, Le Penin 2027-ci il prezident seçkilərində iştirak imkanının qorunması Milli Birlik Partiyası üçün mühüm üstünlük yarada bilər:
"Əgər o, seçkilərdə iştirak edə bilsə, ölkədəki siyasi parçalanmadan və mərkəzçi qüvvələrə yönələn narazılıqdan maksimum yararlanmağa çalışacaq. Yaşayış xərclərinin artması, miqrasiya, təhlükəsizlik və Avropa İttifaqının gələcəyi kimi mövzular sağ populist qüvvələrin əsas siyasi gündəmidir və Le Penin də seçki kampaniyasında bu məsələlərə üstünlük verəcəyi gözləniləndir”.
R.Bayramovun fikrincə, Marin Le Penlə bağlı qərar həm hüquqi, həm də siyasi aspektlərdən qiymətləndirilməlidir:
"Hüquqi baxımdan bu, məhkəmə prosesinin davamıdır. Siyasi baxımdan isə 2027-ci il prezident seçkiləri öncəsi mühüm amillərdən biridir. Hesab edirəm ki, bu qərar Fransada siyasi qütbləşməni daha da gücləndirəcək."
Nigar Xəlilli
20:30 08.07.2026
Oxunuş sayı: 58
