Macarıstan Rusiya qazının Ukrayna üzərindən nəqlinə dair danışıqlar aparır
Macarıstanın baş naziri Viktor Orban bildirib ki, Macarıstan Rusiya qazının Ukrayna vasitəsilə nəqlini açıq saxlamaqla bağlı Rusiya və Ukrayna ilə danışıqlar aparır.
Crossmedia.az xəbər verir ki, Ukraynadan keçən boru kəməri Rusiyanın Avropaya gedən son əsas qaz marşrutlarından biridir. Lakin Kiyev, Çexiya, Avstriya və Slovakiyaya qaz gətirən beş illik tranzit sazişini uzatmaq istəmədiyi üçün bu marşurut ilin sonunda bağlanmalıdır.
“Biz indi bu yolu yoxlayırıq. Əgər qaz Ukrayna ərazisinə daxil olanda artıq Rusiyaya məxsus olmasa, artıq alıcıların ixtiyarında olarsa?.. Yəni, Ukraynaya daxil olan qaz artıq Rusiya qazı olmayacaq, Macarıstan qazı olacaq"- deyə Orban bildirib.
Orban danışıqların davam etdiyini və Ukraynanın bunu qəbul edib-etməyəcəyinin bəlli olmadığını, lakin Macarıstanın Ukraynanın qaz tranzit marşrutundan imtina etməyəcəyini bildirib.
Macarıstan bu il “Türk axını” boru kəməri ilə təxminən 7,5 milyard kubmetr Rusiya qazı idxal edib. Həmçinin 1-1,5 milyard kubmetr qazın yerli istehsalına sahib olduğunu da açıqlayıb.
Slovakiyanın baş naziri Robert Fiko cümə günü Ukraynanın müharibə səbəbindən təbii qazın öz ərazisindən tranzitini uzatmaqdan imtina etməsi, nəticədə yaranacaq qaz böhranı barədə xəbərdarlıq edib.
Tərlan Əmrahova
11:41 22.12.2024
Oxunuş sayı: 15418
