Şimali Kiprdə milli mübarizə və şəhidlər həftəsi münasibətilə tədbirlər keçirilib
Şimali Kipr Türk Cümhuriyyətində 21-25 Dekabr Milli Mübarizə və Şəhidlər Həftəsi çərçivəsində müxtəlif anım mərasimləri və tədbirlər təşkil olunub. İlk tədbir paytaxt Lefkoşada yerləşən Şəhidlər Abidəsi önündə keçirilib.
Crossmedia.az “TRT avaz”-a istinadən xəbər verir ki, Şəhidlərin anım mərasimində ŞKTC Prezidenti Ersin Tatar, Məclis Sədri Ziya Öztürkler, Türkiyənin Lefkoşadakı səfiri Yasin Əkrəm Serim, Təhlükəsizlik Qüvvələri Komandanı General-mayor İlker Görgülü, müxalifətdəki Cümhuriyyətçi Türk Partiyasının Başqanı Tufan Ərhürman, nazirlər, millət vəkilləri, bələdiyyə başçıları, siyasi partiya rəhbərləri, hərbçilər, müharibə veteranları və digər rəsmi şəxslər iştirak ediblər.
Protokol qaydasına uyğun çələnglərin abidə önünə qoyulması ilə başlayan mərasim, şəhidlərin xatirəsini bir dəqiqəlik sükutla yad etmə, ehtiram atəşi və İstiqlal Marşı sədaları altında bayraqların qaldırılması ilə davam edib.
Tatarın Şəhidlər Abidəsi Xüsusi Dəftərinə yazdıqları: ŞKTC Prezidenti Ersin Tatar abidənin Xüsusi Dəftərinə bunları yazıb:
“Əziz şəhidlərimiz, Kipr Türk xalqının misli görülməmiş zülmə və ədalətsizliyə qarşı verdiyi varlıq mübarizəsində canlarınızı fəda edərək şəhidlik zirvəsinə ucaldığınız qara günlərin 61-ci ildönümündə sizləri həsrətlə, rəhmətlə və dərin hörmətlə anırıq. Qəhrəman Kipr Türk xalqının bu torpaqlarda başı dik, şərəflə yaşaması və vətəninə sahib çıxması üçün Mehmetçiklə çiyin-çiyinə ən böyük fədakarlığı edərək canlarınızı verdiniz. Sakitlik və təhlükəsizlik içində, azad şəkildə yaşamaq və öz taleyimizə sahib çıxmaq iradəsi ilə tökülən qanlarınızı və göstərdiyiniz böyük fədakarlıqları heç vaxt unuda bilmərik. Sayənizdə Kipr Türk xalqı bu gün azadlıq və təhlükəsizlik içində yaşayır və bundan sonra da yaşayacaq.”
Prezident Tatar keçmişdə yaşanan acılardan ibrət götürərək daha təhlükəsiz gələcək qurmaq üçün çalışdıqlarını vurğulayıb və bu acıların bir daha təkrarlanmamasını arzulayıb. Tatar əlavə edib ki, suveren bərabərlik və beynəlxalq bərabərliyə əsaslanan iki dövlətli siyasət qan tökülməməsi və Kipr Türk xalqının keçmiş ağrılı günləri bir daha yaşamaması üçün davam etdirilir.
Atatürk Mədəniyyət Mərkəzində anım tədbiri
Lefkoşadakı tədbirlər Atatürk Mədəniyyət Mərkəzində davam edib. Saat 09:50-də başlayan mərasim İstiqlal Marşının səsləndirilməsi və şəhidlərin xatirəsinə ehtiramla açıq elan edilib. Tədbirdə Prezident Ersin Tatar, Kipr Türk Müqavimət Təşkilatı (TMT) Mücahidlər Dərnəyinin rəhbəri Celal Bayar və Şəhid Ailələri və Qazilər Dərnəyinin rəhbəri Gürsel Benan çıxış ediblər.
Tədbir sənədli film nümayişi və Lefkoşa Türk Liseyinin hazırladığı oratoriya ilə yekunlaşıb.
Milli Mübarizə və Şəhidlər Həftəsi çərçivəsində ŞKTC-nin bütün şəhər və qəsəbələrində müxtəlif anım mərasimləri və tədbirlər təşkil olunub.
Fidan Hacızadə
14:44 21.12.2024
Oxunuş sayı: 3817
