Qətər 13 İldən sonra Dəməşqdəki səfirliyini yenidən açdı
Qətər, Suriya münaqişəsinin başlanğıcında bağladığı Dəməşqdəki səfirliyini 13 ildən sonra dekabrın 21-də yenidən açıb. Bu addım, ölkənin yeni hakimiyyəti ilə əlaqələr qurmağa çalışan xarici hökumətlərin səyləri çərçivəsində atılıb.
Crossmedia.az AFP-yə istinadən xəbər verir ki, Qətər bayrağı səfirliyin üzərində dalğalanmağa başlayıb. Beləliklə, islamçı qüvvələrin bu ayın əvvəlində prezident Bəşər Əsədi hakimiyyətdən uzaqlaşdırmasından sonra Türkiyədən sonra səfirliyini yenidən açan ikinci ölkə Qətər olub.
Qətər Suriya müharibəsi dövründə müxalifət qruplarını dəstəkləyən mövqeyi ilə fərqlənib və digər bir neçə ərəb ölkəsindən fərqli olaraq, Əsədi hakimiyyətdə olduğu dövrdə reabilitasiya etməyə çalışmayıb.
Səfirliyin açılışından əvvəl, şənbə günü işçilər ərazini təmizləyərək səfirliyin divarlarından qrafitiləri silib və pavilyonları səliqəyə salıblar. Açılış zamanı isə Qətər bayrağı dirəyə qaldırılıb.
Bununla yanaşı, Doha bir neçə gün əvvəl Dəməşqə diplomatik nümayəndə heyəti göndərərək keçid hökuməti ilə görüşlər keçirib. Qətər nümayəndə heyəti, “Qətərin Suriya xalqına tam dəstək verdiyini” vurğulayıb.
Fidan Hacızadə
13:41 21.12.2024
Oxunuş sayı: 5160
