Türkiyə və İran liderləri Qahirədə görüşüb
Türkiyə və İran liderləri Suriya prezidenti Bəşər Əsədin devrilməsindən sonra ilk dəfə Qahirədə, səkkiz müsəlman ölkəsini birləşdirən sammit çərçivəsində görüş keçiriblər.
Crossmedia.az xəbər verir ki, Suriyadakı uzunmüddətli münaqişədə qarşı cəbhələrdə yer alan ölkələrdən Türkiyə Əsədin əleyhdarlarını, İran isə onun hakimiyyətini dəstəkləyirdi.
Türkiyə prezidenti Rəcəb Tayyib Ərdoğan görüş zamanı ölkəsinin “Suriyada sabitlik və təhlükəsizliyin bərqərar olmasını, terrorizmin tamamilə aradan qaldırılmasını” istədiyini bildirib. O, həmçinin Suriya ərazisinin bütövlüyünün və birliyinin qorunmasının vacibliyini vurğulayıb.
İran prezidenti Məsud Pezeşkian isə Suriyanın ərazi bütövlüyünə “ən kiçik zərərin belə yolverilməz olduğunu” bəyan edib. O, müsəlman ölkələrinin İsrailin “cinayətlərinə” qarşı məsuliyyətlə hərəkət etməli olduğunu bildirib.
Qahirədə keçirilən bu görüş İslam ölkələrinin iqtisadi əməkdaşlığı üzrə D-8 Təşkilatının sammiti çərçivəsində baş tutub. Sammit bölgədəki münaqişələr, o cümlədən Qəzzadakı müharibə, Livandakı atəşkəs və Suriyadakı gərginlik fonunda keçirilib.
Sammitdə çıxış edən Pezeşkian bölgədə “daha çox zərərin qarşısını almağın dini, hüquqi və insani vəzifə” olduğunu qeyd edib. O, 2013-cü ildən sonra Misiri ziyarət edən ilk İran prezidenti kimi tarixə düşüb.
Türkiyə prezidenti Ərdoğan isə bu il ikinci dəfə Misirə səfər edir. Onun fevral səfəri prezident olaraq ilk ziyarəti idi.
Gültac Mehdizadə
03:57 21.12.2024
Oxunuş sayı: 5616
