Ukrayna 2025-ci ildən Rusiya qazının tranzitini dayandıracaq
Ukrayna Baş naziri Denis Şmıqal açıqlamasına görə, Rusiya qazının Ukrayna ərazisindən tranziti 1 yanvar 2025-ci il tarixində, saat 7:00-da dayandırılacaq.
Crossmedia.az xəbər verir ki, o, bu qərarın 5 illik müqavilənin müddətinin bitməsi ilə əlaqədar olduğunu bildirib.
“Avropa Komissiyasının tələbi ilə, yalnız Rusiya qazı olmamaq şərti ilə tranzitin bərpası mümkündür”, - deyə Şmıqal əlavə edib. Bununla yanaşı, Ukrayna məcburi şəkildə Rusiya neftinin tranzitini davam etdirmək məcburiyyətindədir, çünki bu, Avropa Enerji Xartiyası ilə tənzimlənir.
Qeyd edək ki, Ukrayna 2022-ci ilin fevralında Rusiya ilə bütün ticarət əməliyyatlarını dayandırsa da, qaz və neft tranzitinə icazə verməkdə davam edib. Naftoqaz və Qazprom arasında 2019-cu ilin sonunda imzalanmış müqavilə 5 illik müddəti əhatə edir. Noyabr ayında Naftoqaz Qazpromdan tranzit üçün son ödənişi - təxminən 70 milyon dollar - alıb.
Gültac Mehdizadə
03:31 21.12.2024
Oxunuş sayı: 10571
