Avropa

Əcnəbilər Rusiya ordusuna cəlb edilir – Ölkədən çıxış qadağan edildi

Rusiya Prezidenti Vladimir Putin Rusiya Silahlı Qüvvələrində xidmət etmiş və ya hazırda xidmət edən əcnəbilərin deportasiya olunmasını qadağan edən qanunu imzalayıb. Qanunvericiliyə əsasən, həmin şəxslər deportasiyadan qorunur və onların mövcud müvəqqəti yaşayış icazələri, daimi yaşayış icazələri və ya iş vizalarının ləğv edilməsinə, yaxud onlara bu sənədlərin verilməsindən imtina olunmasına yol verilmir. Həmçin 24 fevral 2022-ci ildən bəri Rusiya ordusunda müqavilə ilə xidmət etmiş əcnəbilərin deportasiyası, ölkədə qalma müddətinin qısaldılması, yaxud sənədlərinin rədd edilməsi və ləğvi ilə bağlı qəbul edilmiş bütün qərarlar etibarsız hesab olunur. Rusiyada bir çox dövlətdən yüz minlər hətta milyonlarla xarici ölkədən olan insanların yaşadığını nəzərə alsaq bu məsələ çox ciddi problem yaradır. Maraqlıdır dövlətlər öz sakinlərini Rusiyadan çıxara biləcəkmi? Yoxsa həmin insanlar məcburi şəkildə Rusiya ordusu sıralarında xidmətmi edəcək?

Mövzu ilə bağlı Crossmedia.az-a açıqlamasında hüquq elmləri üzrə fəlsəfə doktoru Əlövsət Allahverdiyev qeyd edib ki, bu qanun xüsusilə Rusiyanın son illərdə xarici vətəndaşları müqavilə əsasında hərbi xidmətə cəlb etməsi fonunda qəbul olunub: “Yeni qanuna əsasən, Rusiya Silahlı Qüvvələrində müqavilə ilə xidmət etmiş və ya xidmət edən əcnəbilər deportasiya edilə bilməz, onlara yaşayış və iş icazələrinin verilməsindən imtina edilə və artıq verilmiş sənədlər ləğv oluna bilməz. Xarici dövlətlər öz vətəndaşlarını birtərəfli qaydada Rusiyadan çıxara bilməzlər. Hər bir dövlət öz ərazisində miqrasiya və hüquqi status məsələlərini özü tənzimləyir. Azərbaycan və ya digər dövlət öz vətəndaşlarına Rusiyada hərbi xidmətə qoşulmamağı tövsiyə edə və ya xəbərdarlıq edə bilər, konsulluq dəstəyi göstərə bilər, diplomatik kanallarla etiraz və ya müraciət edə bilər. Amma Rusiyanın razılığı olmadan həmin şəxsləri ölkədən çıxarmaq və ya qanunun tətbiqini dayandırmaq hüququna malik deyil. Bu qanunun nə dərəcədə düzgün olması isə hüquqi və siyasi baxışdan qiymətləndirilə bilər”.

Ə.Allahverdiyev əlavə edib ki, hüquqi baxımdan, hər bir dövlət öz miqrasiya qanunvericiliyini müəyyən etmək səlahiyyətinə malikdir: “Bu mənada Rusiyanın belə bir qanun qəbul etməsi beynəlxalq hüququn ümumi prinsiplərinə avtomatik zidd hesab edilmir. Siyasi baxımdan isə qanun tənqid olunur. Çünki o, xarici vətəndaşların hərbi xidmətə cəlb olunmasını stimullaşdıran vasitə kimi qiymətləndirilə bilər. Xidmət edən əcnəbilərə deportasiyadan qorunma və yaşayış hüququ verilməsi onların hərbi xidmətə marağını artıra bilər. Bu səbəbdən bir sıra ölkələr və beynəlxalq təşkilatlar bu cür addımlara ehtiyatla yanaşırlar. Azərbaycan vətəndaşları baxımından da məsələ həssasdır. Əgər Azərbaycan vətəndaşı başqa dövlətin silahlı qüvvələrində xidmət edirsə, bu, Azərbaycan qanunvericiliyi baxımından ayrıca hüquqi qiymətləndirmə tələb edə bilər və konkret hallardan asılı olaraq hüquqi nəticələr doğura bilər”.

Ayhan

🖨 Çap et

15:30 27.06.2026

Oxunuş sayı: 56