Ermənistan, Yunanıstan və Kiprin hərbi əməkdaşlığı: ehtiyat addımlarının atılması vacibdir
Ermənistan, Yunanıstan və Kipr arasında müdafiə və təhlükəsizlik məsələlərini əhatə edən üçtərəfli məsləhətləşmələrin nəticəsi olaraq, tərəflər arasında yeni əməkdaşlıq proqramı imzalanıb. Bu proqram regional bölgədə sabitliyi ciddi şəkildə təhdid edir.
Əməkdaşlığın Cənubi Qafqaz və digər bölgələr üçün təhlükələri və buna qarşı Türk ölkələrinin addımlarının vacibliyi haqqında politoloq Elçin Xalidbəyli Crossmedia.az-a açıqlama verib.
Onun sözlərinə görə: “Ermənistan, Yunanıstan və Kipr — bu üç ölkənin hər biri Türk düşmənçiliyi aparan dövlətlərdir. Türk düşməni olan ölkələrin ortaq fəaliyyət proqramları hazırlaması təəccüblü deyil. Şübhəsiz ki, bu dövlətlər xüsusən də Azərbaycana qarşı yönəlib. Geopolitik proseslərdə Türk Dövlətləri Təşkilatı ilə rəqabət aparmaq gücü qazanmaq üçün üç Türk düşməni öz qüvvələrini birləşdirmək kimi cəhdlər göstərir. Ancaq bir məqam var ki, Türk coğrafiyası dövlətlərinə qarşı düşmənçilik siyasətini yürüdən ölkələrin sırası yalnız bu üç Türk düşməni ilə məhdudlaşmır. Onların arxasında Ermənistanın əsas himayədarı olan Fransa da dayanır. Ermənistanı Cənubi Qafqazdakı özünün siyasi müstəmləkəsinə çevirib. Regionda vəziyyəti gərginləşdirmək üçün Ermənistandan istifadə edir. Bütün bu reallıqları nəzərə almaqla həm Azərbaycan, həm də digər Türk dövlətləri preventiv addımlar atmaq barədə düşünməlidirlər. Çünki Türk dövlətləri birləşdikcə onların düşmənləri də birləşməyə çalışırlar. Rəqib gördükləri Türk Dövlətləri Təşkilatına müəyyən zərbələr endirmək cəhdləri göstərirlər.”
Elçin Xalidbəyli bildirib ki: “Ümumi olaraq, bu üç ölkənin hərbi, iqtisadi və siyasi potensialının, Türk Dövlətləri Təşkilatının hərbi, iqtisadi və siyasi potensialından geri qaldığı da inkar olunmaz gerçəklikdir. Lakin bununla belə ehtiyat addımlarının atılması vacibdir. Əgər bu cür əməkdaşlıq proqramlarına və cəhdlərinə əhəmiyyət verilməzsə, yaxın gələcəkdə Türk Dövlətləri Təşkilatı müəyyən problemlərlə üzləşə bilərlər. Ona görə də belə təhlükələrin qarşısının vaxtında alınması daha doğru yanaşmadır. Azərbaycanla düşmən olan Ermənistan da bu proqramın tərkibinə daxildir. Ölkələr arasındakı qarşıdurmanın Ermənistanın xeyirinə çevrilməsinə imkan vermək heç cür olmaz.”
“Ermənistanın həm Yunanıstan və Kiprlə, həm də Fransa ilə əməkdaşlıq sahəsində öz hərbi potensialını artırmasına icazə verilməməlidir. Bu baxımdan Azərbaycan və digər Türk dövlətləri də vahid ortaq fəaliyyət proqramlarını daha da gücləndirərək, vahid hərbi-siyasi və vahid iqtisadi-ticari məkan formatında fəaliyyət göstərilməsi üçün intensiv və israrlı addımların atılması barədə tədbirlər görülməlidir,” -deyə politoloq qeyd edib.
Fidan Hacızadə
19:15 20.12.2024
Oxunuş sayı: 10392
